官恩娜（Ella）最近被指雙眼再度發育，兩眼距離拉近，雖惹整容嫌疑，但昨日她與賈曉晨（JJ）同場卻被對方性感比下去。對於整容傳聞，Ella聲稱「100%冇整過」，為表清白，更不惜勁彈自己身體多處地方不夠好看。
現年28歲的官恩娜近日被指雙眼整容，並以她在02年電影《IDO》的劇照及08年之間的照片作比較，暗指她整容令兩眼距離拉近，又指她近日在晚上重播的《酒店風雲》中雙眼無神，距離很遠，反而早前播映完的《律政新人王2》，雙眼就顯得十分明亮。
昨日Ella與賈曉晨到銅鑼灣出席護髮產品活動時就否認整容傳聞，她顯得毫不介意並笑說：「因為化妝品唔同，唔係啲人買化妝品做乜？唔可以只靠兩張相，我一生出嚟就係咁，咁應該要畀番credit我媽咪，加上啲相一幅有黐眼睫毛，另一幅就冇。」
JJ短裙仔搶鏡
Ella續說：「自己唔介意人哋講我，只係身體髮膚受諸父母，唔會亂咁搞，我反而驚嚇親父母，以為我做咗啲乜手術，總之我比較鍾意natural，100%冇整過，因為係父母賜給我。」她更一口氣數自己不夠瘦、不夠高、手掌又太大，但也是無意做手術改善，更自爆左眼三眼皮、右眼就雙眼皮，聲稱若曾整容便十分失敗。
雖然Ella成為話題人物，但她跟打扮性感的JJ同場時就明顯被比下去，JJ以迷你裙及低胸背心示人，吸引不少男士圍觀，反而以前毫不吝嗇性感的Ella就以超密實服飾出現，Ella說：「JJ好靚呀，我唔係只係性感，而且唔使次次都咁博，我又唔覺得好熱啫。」
採訪：駱華齡
攝影：陳偉權