「馬來亞春色綠野景致艷雅……」，同事阿翁旅行返嚟，佢話去完「瓜啦隆坡」，大吉利是！邊個瓜喇？原來聽講英文係KualaLumpur嘅吉隆坡，本來中譯係瓜啦隆坡，但當地華人以廣東人為主，覺得唔吉利，索性改做「吉」隆坡。
佢搞到我都想去玩，所以噚日去亞洲航空（AirAsia）網站訂$99特惠單程去吉隆坡機票，但唔夠人爭，剩番最平係單程$258。我打去亞航問，佢哋話噚日凌晨開始預訂，結果12小時內6,000張$99機票幾乎全部售罄，有人仲順便飛埋新加坡、布吉㖭呀。
我諗住加埋$700附加費都係$900之嘛，訂唔到平機票都係唔去。但我睇吓個網，原來亞航調低咗燃油附加費，由本來每程$188減至$100，來回平咗成$176，連埋機場稅等總附加費減到$500度，加埋機票大約$1,000。噫，咁都withinbudget喎。可能之前俾人話佢哋雜費貴所以減啦，但最好國泰、馬航都減就好囉。哈！
逢周一至周四刊出