多國央行聯手向市場注資，港股噚日跟隨美股升勢攀升超過400點，形勢大好，嘉賓同主持均認為港股已見底，可適當買貨。
朱：朱紅 鄧：鄧建初 孫：孫柏文
孫：美市造好，港股之前兩日先跌後抽升，𠵱家再升427點，大家點睇？
鄧：其實係大戶估到伯南克有動作，睇到長實（001）呢排強勢，可以用佢嚟做指標，佢升時個市一樣升嘅現象。我覺得恒指低位已見，只要後市守得住現水平，就有機會向上挑戰番下降軌嘅阻力位。
孫：港股之前連續兩日都係先跌後抽升，窩輪市場啲call、put有冇反映到乜嘢啓示呢？
朱：通常投資者睇大市，如果睇升會掃定call輪，但呢幾日又唔見有好多投資者追入call輪，資金流向整體都比較審慎，投資者揀輪似乎都係揀長線啲，7、8月到期嘅會多啲。
孫：有人話中鐵建（1186）招股抽走晒啲資金，令窩輪成交少咗，係唔係呀？
朱：窩輪嘅成交都係200幾億左右，唔覺有大縮嘅情況。
孫：咁𠵱家有資金嘅話，做啲乜好？
鄧：都係吼啲跌幅唔太多嘅股份，例如可以考慮平安保險（2318）。
孫：平保有乜嘢窩輪可以選擇？
朱：睇好平保想買佢嘅窩輪嘅話，可以考慮啲行使價比較貼價嘅窩輪，窩輪年期長期好過短期，因為通常當正股升上，𠵱類窩輪都會有兩、三倍槓桿比率，回報都算唔錯。
玖龍紙業（2689）
唔怕跌照加注
關公：講吓我隻愛股玖龍紙業（2689），建議11蚊買入，目標價13蚊，嚟緊有隻紙品股上市，有機會炒吓影子概念。
孫：玖紙跌穿1月嘅低位，你點睇？
關：跌多啲就買大啲。我啱啱走咗轉，11蚊買，11.7蚊走，其實我喺十幾、廿蚊嗰時都有買過，佢哋主席自己都喺12蚊樓上增持啦！
鄧：股價比起高位下跌超過一半，國際對紙嘅需求將來會冇咁大，加上國企舊年嘅PE（市盈率）已經唔可以用嚟衡量今年表現，所以一定要留意業績。
大埔關公個案
買入價：11元 目標價：13元
止蝕價：10.3元 時期：一星期
中國化肥（297）
受惠國策值博
Allan：我6.8蚊買入中國化肥（297），因為從技術分析見佢每逢喺50日同20日交叉點有升浪炒上，所以買佢。我會7.5蚊收割，以我嘅經驗睇呢隻股最易炒上一成，如果要求20%就要小心啲睇。
鄧：呢隻股受惠國策都幾好炒，又有分拆業務概念，不過要識得吼位走人。其實同類股份揀隻中海油化學（3983）會穩陣啲。
朱：我都同意6.8蚊可以上車短炒一轉，但係不宜大注。
Allan：我呢排專登搵冇輪嘅股炒，驚啲輪會影響正股表現。
孫：嘩！好獨特嘅見解，不過又makesense喎。
黃大仙Allan個案
買入價：6.8元 目標價：7.5元
止蝕價：6.7元 時期：一個月