好多人都話女人係水做，因為女人同水一樣變幻莫測。中國銀監會前副主席、現任中國光大董事長唐雙寧就話，金融先係用水做，仲用潮水形容次按。
唐雙寧仲係中國銀監會副主席嗰陣，曾經寫過一篇叫做《金融如水》嘅文章。內容講過不良貸款好似海底嘅礁石一樣，一早已經喺度，資金寬鬆嗰陣，就好似潮漲咁畀啲水遮住；唔夠資金嘅時候，就同潮退一樣，啲礁石一眼就會望到。
噚日華華睇《21世紀經濟報道》，唐雙寧再次引用呢篇文章去講解次按嘅影響。唐雙寧話，次按危機仲未見底，所以大家要冷靜啲去觀察次按嘅總數、範圍同埋影響，而中國𠵱家可以做嘅，就係要吸取美國嘅教訓，增加自己對次按嘅抵抗力。
佢仲話，如果唔小心處理次按危機，同埋貨幣政策執行得唔好，就會出現雙重效應，令到金融資產嘅「潮水現象」加劇。唔知任志剛聽到唐總咁講，會唔會更加小心呢啲礁石呢？