呢幾日天氣暖番，係時候買新衫晒吓香肩玊腿喇！早兩日小妹行街，見到唔少牌子今季嘅衫褲都以大紅大紫嘅顏色做主打，睇到眼花花。時裝設計師夏嘉懋就話，今年春夏季流行嘅顏色會好似萬花筒咁花碌碌，所有螢光粉紅、鮮綠、黃色等鮮艷嘅顏色都會大行其道，又好興玩撞色。佢仲提醒姊妹們，今個夏天繼續流行短裙、短褲，所以選啱一對鞋襯番對美腿，出街梗係成為全場焦點啦！
唔怪之得一向以牛仔褲出名嘅意大利品牌Replay，最近都推出咗唔少顏色鮮艷嘅春夏系列鞋款。好似充滿懷舊色彩嘅布鞋系列，就用咗鮮橙、粉紅同鮮藍等鮮色布料，經過洗水之後，令對鞋充滿粗糙同街頭文化嘅感覺（圖）。沙灘凉鞋就用咗粗帆布、皮革同麻質等物料，男士們着住佢去沙灘一定更加有男人味啦！我嘅首選梗係金色或者銀色嘅平底鞋，簡約得嚟又不失搶眼兼高貴大方嘛！
逢周一至周四刊出