呢排好多八卦雜誌都話小小超李澤楷用一億幫梁洛施贖身，姑勿論呢單係咪堅料，有網友已經當正呢件事係真咁討論。
喺網上討論區，EDWIN就以「怪股即係怪股，唔通梁洛施腳頭好，連升幾日，簡直係奇迹」為題，話自從小小超同梁洛施傳出緋聞之後，電盈股價就係咁升。華華睇番資料，咦，真係喎，自從傳出擬似梁李戀之後，就算個巿跌，電盈都係咁升喎！難怪網友mpchan估話：「唔通Isabella旺Richard。」
網友Zlocarman就話：「哈哈哈，PCCW變咗梁洛施，咁恒地（012）係咪徐子淇？」呢位網友仲話，電盈股價係咁升，係因為「市場憧憬PCCW會發展埋香港電影業。」網友清凉綠豆兵客觀啲話：「可能真係業績支持。」EDWIN更有無限遐想，講笑話如果小小超真係娶Isabella，一定會收購英皇娛樂（8078），所以𠵱家會入定貨先。