二月中，老編突然撥個輪嚟話Volvo代理安排去北極試車，嘩？講真定講笑，就信住先。查證之後方知道係就係去北極，不過係瑞典北邊嘅北極圈範圍啫！氣溫估計都會去到零下二、三十度嘅，最擔心嘅係相機電池會「凍死」，相機Hang機咁囉！到時真係名副其實「天蒼蒼、野茫茫」白茫茫一片叫天不應叫地不聞，唔知搵邊個救我……部機嘞！於是乎由通知到出發不足一星期，陪我飛嘅就係成篋衫兼四圍「搜括」返嚟嘅暖包。
呢次行程都夠晒曲折，要由香港飛北京，再由北京轉飛瑞典首都斯德哥爾摩，停留一晚等第二日至有航班飛往是次試車目的地Kiruna，再進行一連串正到暈嘅Icedriving活動。到斯德哥爾摩，一落機，嘩！係估唔到嘅風光明媚，風景靚到隨手都可以影到PostCard。之不過千祈咪除手襪，事關陽光燦爛之下嘅風係蝕骨㗎。唔使一分鐘，暴露喺空氣中雙手已經無晒知覺，有太陽都如此，想像到明天開始無太陽守護、兼溫度再降多廿幾三十度嘅情況嘛？（待續）
記者、攝影：梁美甜
鳴謝：VolvoCarsHK