美職聯洛杉磯銀河領隊古列治（RuudGullit），繼大前日凌晨帶隊友同李珊珊喺中環夜蒲之後，噚日凌晨時分古列治又趁留喺香港嘅最後一晚，帶埋成班隊友落去中環富豪蒲竇Qube度同李珊珊、苗僑偉（三哥）、戚美珍以及艾威等人夜蒲消遣。
碧咸唔敢露面
聽講萬人迷碧咸本來答應出現，點知佢一出酒店見到大班記者，即刻嚇到縮番上房唔敢露面。
古列治同隊友蒲到凌晨2點半左右就離開，唔知係咪前日下晝佢領軍嘅銀河喺互射12碼嗰陣輸咗畀南華，所以離開時個樣唔係幾友善，同佢講goodnight都唔應。大約3點半左右，三哥、戚美珍同李珊珊等陸續離開，問珊珊碧咸有冇蒲頭時，佢就故作神秘咁話：「唔知呢！」
「唔可能同人比」
被指同李珊珊復合嘅錢嘉樂，噚日喺將軍澳電視廣播城宣傳《鐵甲無敵獎門人》，見到傳媒即話：「外籍人士唔好問我。」及後一講李珊珊即面紅流汗，提到要同古列治拗手瓜，錢嘉樂話：「唔可能人同人比。」對李珊珊同古列治態度親暱，錢嘉樂維護李珊珊話：「正常社交應酬，佢係明星足球隊負責啦啦隊策劃成員之一，呢啲係禮貌上招呼，唔係過份行動，唔使呷醋。」至於李珊珊會否被外籍男士吸引，錢嘉樂話：「唔知喎，一時一樣，我唔會問，緣份唔會分國籍。」
另外，馮仁昭噚日打電話問三哥，佢大讚古列治友善之餘，仲話：「我同佢傾吓波經，大家都話好欣賞碧咸。」好多人覺得作為領隊成日帶隊友夜蒲好似唔係咁好，三哥就力撐古列治話：「輕鬆吓啫，做任何工作都要間唔中減吓壓㗎啦。」
