噚日港股先跌後回升，早市承接上周弱勢最多跌466點，不過午後開始收復失地，恒指倒升203點收市，雖然個市喺低位反彈，不過嘉賓及主持對後市都唔多睇好！
姚：姚浩然 孫：孫柏文 玲：楊慧玲
玲：今日個市突然抽升，會唔會係引人入局格呢？
姚：有咁嘅可能，之前個市跌咁多挾一挾淡倉。不過我對後市有保留，宏調同美國次按應該未咁快完結，大方向應該到下半年至比較清晰。𠵱家個市唔明朗因素多，所以近期個市反彈唔可以太高興，策略都係等高位做少少put。
玲：今日公用股板塊起飛，港燈（006）升咗3.5%，中電（002）仲升成6%，大家對呢兩隻股票點睇？
姚：我諗有幾個原因，首先部份資金喺波動市要搵避風塘，所以揸公用股，而高盛出咗份報告將中電納入確信買入名單，高盛效應真係唔好唔信。
孫：今日中鐵建A股喺內地首日掛牌，個價唔算太靚仔喎，H股中鐵建（1186）星期四喺香港上市，又點睇呢？
姚：今日中鐵建A股真係令人有啲失望，唔多唔少受到整體A股情緒影響，仲有兩日H股先上市，睇吓A股??兩日可唔可以追番少少。
孫：滙控（005）今日都升成3.4蚊，好強勁反彈，點解呢？
姚：一來投資者憧憬佢返內地掛牌，雖然未落實，但都算係好消息；二來上星期華爾街唔係全線金融股都跌，加上大戶要挾淡倉，佢同中移動（941）係重磅股，所以成為挾淡倉嘅工具
聯通（762）
憧憬拆骨股價穩
黃小姐：我朋友叫我買隻聯通（762），想問吓買唔買得過？
姚：𠵱家內地電訊業講緊重組同發3G牌，啲人憧憬佢拆骨，所以股價比較硬淨，不過好多利好因素已經反映咗。上望19至20蚊，要到16蚊附近先值博。我個人覺得內地電訊股揀中移動（941）比較好，佢喺農村增長唔錯，加上淨現金多，企業經營策略比較易睇。
玲：我都同意大陸電訊股入面，中移動同中電信（728）比較好。
孫：其實好多炒開內地電訊股嘅人都會揀中電信，而中移動就有好多基金經理長揸。
黃：佢同A股上市嘅聯通係咪一樣？
孫：根本係兩間唔同公司，大家嘅資產唔同，就好似長江實業（001）同長江基建（1038）咁，係完全唔同。
《屯門黃小姐建議》
建議買入價：17.8元
目標價：-
止蝕價：-
時期：一星期
白銀call輪（3426）
睇好商品買白銀
Frederick：我本身睇好商品，隻荷銀白銀call輪（3426）你哋點睇？
孫：我一向睇好白銀，我睇見120蚊美金，宏觀啲嚟睇，近期資源股好好，油價喺105蚊企穩。Frederick你又點睇油價同石油股呀？
Frederick：點解油價升大陸油股咁弱？不過隻中海油（883）相對強勢喎。
姚：大家都知中石油（857）有中下游業務，中海油就唔同，佢主要做上游，油價升對佢有利，所以個勢較強。仲有係中海油每年嘅石油產量都有增長。
Frederick：黃金升近1000蚊，90年代有句說話「十年黃金變廢銅」，係咪真有其事？
孫：黃金應該仲有得升，不過從事黃金行業的邊際利潤比以前差，所以其他金屬股反彈空間會較大。
《銅鑼灣Frederick建議》
建議買入價：0.249元
目標價：-
止蝕價：-
時期：半年
