一班藝人昨日出發到四川雪災地區送暖，蔡少芬和張晉首次夫妻檔工作，他們幾乎全程拖手晒恩愛，婚後生活愉快的蔡少芬，自言放了兩個多月婚假也不夠，希望盡量黐實老公，她甜笑說：「難得有得黐唔黐咩？」
蔡少芬1月初下嫁內地藝人張晉後，一直處於放假狀態，兩夫婦有影皆雙，昨日他們還首次夫妻檔出外做善事，應演藝人協會之邀，與陳法蓉、楊千嬅、谷祖琳及洪天明到四川探訪受雪災影響人士。
陳法蓉失門匙
昨早陳法蓉遲到半小時才到達機場，她即向眾人道歉及解釋：「我唔見咗屋企鎖匙，搵極都搵唔到，𠵱家叫鄰居幫我睇住間屋同換鎖囉。」好友蔡少芬安慰她說：「唔怕，啲賊見到報紙時，個鎖已換咗。」蔡少芬昨日幾乎全程拖着老公手不放，不但以行動晒恩愛，連說話也要甜到漏，她表示首次和老公出外探訪，目的地是成都的雅安，她又說：「當年拍拖時都冇呢啲情況，所以冇機會。」
她被取笑把自己說得像老夫老妻一樣，蔡少芬也忍不住甜笑，張晉則說：「我都係四川人，去過雅安表演，可以幫家鄉嘅人做嘢，我願意出一分力。」看蔡少芬含情望着老公說話，問她是否自覺得幸福，她說：「睇到人哋唔愉快，自己又點會愉快，我哋會同歡樂同哀哭。我自己有幸福，都希望人哋有，可以同人哋分享喜與悲，幾得意，我同老公第一次合作就係幫人做嘢，都係一種祝福。」
「未想開工住」
蔡少芬婚後放了兩個月假期，她說：「我未想開工住，之前拍咗一年嘢，只係休息咗兩個幾月，還下啲廣告債。」她被取笑其實想多點時間纏着老公，蔡少芬笑說：「呢個原因都有，咁好黐點解唔黐？難得有得黐唔黐咩？」張晉聞言害羞得不停向記者說：「多謝晒。」十分搞笑。
千嬅昨早見人時眼腫面腫，她表示病了一星期未痊癒，大前晚才從上海工作返港，她說：「我噚日去打咗支針，要帶晒啲藥去呀，好彩𠵱家算冇咁凍，有8度。」問到怕不怕病情加重變成要人照顧，千嬅說：「我好硬頸，冇事嘅，我仲帶多個學生去做義工呀。」
採訪、攝影：駱華齡
