近排發覺手機嘅電池，明明叉滿電，但講唔夠一陣就好快冇電，又係時候換電池。今次想換吓啲雜嘜電池，貪佢平過原裝電兩、三成，但又驚啲雜嘜唔安全，都係請教吓消委會啲老友。老友話，海關最近測試咗六款非手機原廠牌子代用電池，包Goki、Momax、Npower、Osaka、Sido同Speedy。測試佢哋短路保護同過度充電兩個項目，所有樣本都通過測試。
咁樣講，雜嘜手機電咪又平又安全？老友話，今次測試只係局限兩個項目，唔保證樣本百分百安全，加上巿面雜嘜咁多，有啲仲係來歷不明，唔排除有冒牌或劣質貨品，所以選購時要格外留神。應該要買一啲有註明設短路保護嘅產品，同埋註有製造商或代理商名稱同聯絡資料嘅款式，有乜意外都可以追究責任。
老友又話，機電工程署都試咗六款手機牌子嘅充電器，同埋四款代用充電器，前者全部通過安全測試，後者即四款代用充電器包括Speedy、Goki、G4同Momax都有絕緣距離不足問題，會有短路危險。Momax嘅Mxtcrs1-Mov3充電器仲可能出現漏電，用戶觸摸充電器接點有觸電可能。
逢周一至周四刊出