Hyundaii301.4專配手波　任你舞

手波車對於好多駕駛者嚟講，兩個字：麻煩！尤其塞車上斜嗰陣要吊極力子，簡直令你大叫救命。不過，唔少死硬派繼續力撐手波車，追求都係嗰種一切由自己控制嘅感覺。最近手波一族又有新成員抵港，Hyundaii301.4手波版，佢嘅魅力就梗係順得人，任你舞啦！

記者：鄭達基
攝影：陳盛臣
模特兒：Julie（TheGroup）

重拾爽快駕駛感

老實講，仲有配備手波嘅新車款可以話係越嚟越少，就連嗰啲標榜高性能表現嘅SuperCar，都漸次改配自動波，搞到好似我呢啲「手波死硬派」幾乎無車可揀。所以一聽到Hyundai代理運嚟i301.4嘅手波版，「手痕」嘅我就梗係舉手話要試啦！雖然呢部i30係以一台1.4公升直4引擎作動力核心，馬力輸出亦只得109匹，但賣點就在於佢配備咗同級少有嘅5前速手波。見到佢，我忽然有種重拾駕駛樂趣嘅感覺，事關自己以前兩部車都係手波，後來喺揀無可揀嘅情況下，先迫於無耐揀咗部自動波車做新座駕。難得今日可以再揸番手波車，感受「四肢齊郁」嘅好玩駕駛樂趣。

■咪以為1.4公升引擎一定無力，原來佢都有109匹㗎！

■好似跑車一樣，入後波嗰陣要先抽起波棍的下嘅抽板。

■5前速手波係佢嘅賣點外，就連波棍的嘅電鍍裝飾都係全新。

■錶板用咗四圓銀框設計，中間有液晶顯示屏。

■軚盤右下方，設有頭燈角度同錶板光暗調校。

上斜一鼓作氣

可能自己真係太耐無揸手波車，所以喺駛出維修中心門口前，已經死咗火兩次兼成日踩空油，諗番起都真係瘀到爆燈。幾經辛苦終於駛到馬路上，哈，揸吓揸吓就習慣咗佢嘅極力子，操控明顯比先前順滑好多，燈位起步無再死火，轉波嗰陣無再「跑馬仔」。
我用盡嗰台1.4公升引擎嘅動力，載住3個人跑上大斜路。喺斜路前拖低一個波，讓引擎回復稍高轉數，即刻好似變成一部大馬力跑車咁，一鼓作氣衝上去。加上低重心嘅底盤結構，即使喺迂迴嘅彎路上疾走，都可以靈活完成，真係爽到爆！

■C柱設有小窗，車身線條亦變得流暢。

■門邊鏡下方加有指揮燈。

■平實15吋胎軨，泥擋觀感亦唔太好。

■尾燈唔只係直立式，最好係透光度夠高。

車廂加電鍍型晒

滿足咗自己揸手波車嘅慾望後，係時候睇吓呢部08年新版i301.4同之前有咩分別。外形方面，新版依舊保留原來酷似歐洲車嘅流線形車體設計，不過稍嫌15吋合金胎軨嘅設計斯文，加上後方泥擋同車身唔同色，喺觀感上扣咗些少分。至於車廂，新版同舊版嘅最大分別，係加入咗好多電鍍裝飾，而三幅式軚盤仲換埋原廠真皮，手握感同觀感都好好多！車廂空間就一樣闊落，即使乘客有幾高大，都一樣舒服。