自十年前拍罷無綫劇集《天地豪情》後未有再為無綫拍劇的周海媚（海味），昨日回巢為無綫新劇《學警狙擊》試造型，闊別娘家十年的她笑稱自己為「老牌新人」，海味表示由於覺得劇本及演員十分吸引，加上時間上許可，所以再度為無綫拍劇。
周海媚、江若琳、苗僑偉、吳卓羲及陳鍵鋒等昨日於將軍澳電視廣播城，為無綫新劇《學警狙擊》試造型，闊別無綫十年的周海媚於劇中飾演黑幫大佬的太太，昨日她即十分鬼馬以阿嫂身份，向其他演員講笑訓話，更笑指自己是老牌新人。海味表示無綫近年不時向她招手拍劇，但由於早前在內地一直有工作，未能抽身。
「地方大好多」
周海媚表示對劇中新晉小生相當熟識，問到十年未有為無綫拍劇可怕不習慣時，她說：「都冇乜嘢會唔慣，只係地方大好多。」海味亦十分開心能與苗僑偉合作，原來兩人當年雖合演《楊家將》，但甚少有機會同場。問到苗僑偉劇中可有與海味親熱時，三哥說：「未知！不過咀都係好平常，咁大個人有乜嘢未見過，最緊要劇情需要，如果只係為咗畀觀眾睇就核突喇。」
唔怕傳緋聞
吳卓羲與江若琳於劇中同樣有感情戲，兩人直言不擔心會傳緋聞，吳卓羲說：「我向來都係工作至上，緋聞呢啲我真係控制唔到。」問到江若琳與吳卓羲可有親熱戲時，她說：「唔知喇！佢哋都冇講，不過做演員冇得揀，乜嘢都要做。」
此外，陳鍵鋒昨日以一身軍裝造型出現，他表示剛放完半個月大假，到了泰國、沙巴及日本旅行，於沙巴旅遊期間更考獲潛水牌，他表示入行至今多年沒有放過長假，所以開劇前特意請大假去旅行充電。
採訪：王崇穎
攝影：陳慧安
