唔知大家有冇發覺，好多散戶抽新股時，都鍾意喺最後關頭先撲去銀行填表、交表，不過，如果各位散戶諗住抽旺旺（151）嘅話，就要小心啲睇清楚個截止招股日期。
噚日公開招股嘅旺旺，晏晝出咗份澄清通告，話黃表將截止接受申請時間印咗「二零零八年三月十四日星期四中午十二時正」。14號明明係星期五，咁究竟係14號截止申請，定係星期五截呢？通告話，截止接受申請時間應該係14號星期五中午12點正，公司已經採取步驟替換現有版本嘅黃色申請表格。
波司登無端變負資產
其實招股時出錯唔係第一次，舊年波司登（3998）上巿，招股書都唔小心喺資產淨值前面加多咗個負號。華華個公關朋友話，其實所有招股文件，佢哋都會最尾過目一次以防有錯，不過可能幫旺旺做嘢嘅公關太忙，先會睇漏眼啫！
好在今次旺旺係印錯截止招股日期，如果佢哋啲仙貝呀、黑白配呀，印錯個食用日期，到時真係出咩聲明都唔掂呀！