周潤發同楊紫瓊演出嘅西片《戰火逃城》(TheBitterSea前名《苦海》）原定下個月會同劉德華嗰部《三國之見龍卸甲》打正對台，呢兩部戲喺香港映期都係下個月初，香港觀眾近年已經好少睇到發哥同華仔對打啦！但內地映期就可能有變，因為自從《蘋果》同《色，戒》喺內地上映後，掀起好大風波，湯唯更因此而喺內地被封殺㖭。
奧運期多限制
近日有傳內地要將之前已經送檢戲重新再檢，即係話之前就算已攞咗批文嘅戲，好似《一個好爸爸》、《戰》片同《三》片一樣受波及要重檢，由於咁多戲壓晒落嚟，相信嗰班官員都要時間睇戲，所以呢啲戲映期肯定受影響。
臨近奧運前，內地對電影審查會更加嚴格，有傳踏入六月唔會批准任何戲喺北京拍，其他城市就七月後唔可以拍攝外景，政府要全城迎奧運，四月後開始所有合拍片申請內地批文都會押到九月後先處理，呢啲措施搞到香港公司要將所有開戲計劃叫停，因為𠵱家香港大部份戲都係同內地合拍，始終俾內地政策牽住鼻子走。