好久不見嘅舊同事叫吃午飯，於是去鏞記赴會，恰好馬局長是日請客，我哋坐在房門外，當然唔知佢講乜，睇嚟都係趁正月未完，請記者擦吓牙先。
馬局長管經濟與商務，經常表示香港經濟唔錯。睇數據又係噃，一月份零售業好好景，萬物騰貴，樓市交投暢旺，樓價升完又升，炒地舖，炒寫字樓，炒工業樓，炒到飛起，乃一片好景之象徵也！
但係貿易Ｎ就猛咁呻：「我就認為經濟不景嘞，我做原料供應嘅，以目前油價突破一百美元一桶嚟講，我應該賺到好多好處至啱，但對唔住，呢排收到好少訂單，啲廠商完全按兵不動，冇向我買貨。我到珠三角巡視一番，見到好多中小廠，即係我嘅客戶羣，停業嘅停業，搬廠嘅搬廠，準備留在當地嘅，就話畀我聽美國入口商冇新單到，驚美國衰退，故此佢哋亦唔向我買原料嘞。喂喂，冇單，我幾難頂㗎，舊年幾好景，我畀銀行利息一年過千萬元，今年一開波就暈暈地咯！」
珠三角廠商受人民幣升值，民工薪水升，民工短缺，勞動合同法實施與國家政策打擊三來一補所影響，加上缺水缺電，再加上美國訂單遲來，可以話冇啖好食，搵咗錢嘅已經上岸，停業算數。貿易Ｎ因此叫苦連天，係有佢理由嘅。
點解廠家話難做，市面就一片興旺呢？想來係過往一兩年好多人在金融業、航運業、炒股業賺咗大錢，加薪加花紅，有大把積聚，仍然可以飲得杯落，食得蘇眉所致，可以講得係「消耗性消費」，大家塘水滾塘魚，股市牛市不再嘅話，兩年後就無以為繼嘞。我哋嘅生水，始終來自美國，美國次按債券危機，沒完沒了，聯儲局主席貝南克看來黔驢技窮，竟然建議銀行╲貸款機構「剃頭」（haircut），向房屋按揭借款人大發慈悲，削減本金咁都得？銀行一旦願意剃頭，剃頭數目立即係撥備，大大影響銀行利潤，甚至細銀行會因此倒閉，引發新一輪危機，禍及全世界金融系統。如果美國政府真係推行剃頭政策，要銀行跟隨嘅話，我哋要快啲賣晒股票，揸番現金。