企喺球迷立場，今屆英足盃4強竟然佔3隊係英冠隊，見住唯一英超隊樸茨茅夫1揪3爭冠軍，真係睇嚟都嘥氣，好悶呀！
不過諗得宏觀啲，英冠隊難得可以一圓喺溫布萊踢波嘅夢（4強已經喺溫布萊上演），仲要今屆對手易啃啲大咗機會捧盃，都戥佢哋開心嘅！卡廸夫城嘅哈索賓基同西布朗嘅菲臘斯呢兩位老鬼，祝你哋夢想成真，大發光芒鬥閃！
西布朗４強對老樸
大家都知35歲嘅哈索賓基後生時好勁，打過車路士、列斯聯同馬德里體育會呢啲大會，不過原來佢未試過代表球會入過溫布萊踢波㗎（只計正式賽事）。記得哈索賓基00年6月先加盟車仔，但係同年5月車仔就喺溫布萊上演嘅英足盃決賽，1:0擊敗阿士東維拉捧盃，不過唔關賓仔事㗎！
英迷小注中千倍過關
之後溫布萊要重建，決賽已移師至卡廸夫城千禧球場進行，01/02球季車仔又殺入英足盃決賽（0:2負阿仙奴），當時賓仔仲打正選㖭，但係就喺千禧球場踢囉，所以賓仔未試過喺溫布萊表現自己㗎！今屆4強抽中對班士利，唔知佢可唔可以再進一步呢？至於34歲嘅菲臘斯更加唔使講，咁多年都係打新特蘭同修咸頓等嘅細球會，邊有機會喺溫布萊落場吖。今次4強對住樸茨茅夫，我求大俠都祝埋佢成功啦！
其實今屆4強冇咗Big4已經係難得一見，更勁嘅係仲要打破埋百年歷史、得一支頂級聯賽隊伍躋身4強之列，簡直就係異象㖭啦！21年嚟4強冇Big4蹤影，莊家經已發過豬頭，聽講有個英國球迷仲勁，買咗10便士班士利、卡廸夫城、西布朗同樸茨茅夫入4強，賠率高達1,188倍！之不過佢買得少吖收番118.8鎊（約1,870港元），唔係一早發咗達咯。
英足盃4強
班士利（冠/6.5倍）vs卡廸夫城（冠/4.8倍）
西布朗（冠/3.8倍）vs樸茨茅夫（超/2倍）
（）內所屬聯賽及奪標賠率
資料來源：足智彩
賽事在4月5至6日於溫布萊舉行