自從舊年施政報告落實咗興建港鐵西港島線，港島西區物業吸引咗唔少生面口買家入市，炒又好、住又好，總之齊齊谷到西環樓價直線上升。除咗炒家同街坊客，仲有混血名模。
噚日同世紀21堅城地產分行經理楊海燕傾開，佢話最近有位混血名模，用275萬銀買咗堅尼地城嘅卿旺大廈一個500幾呎單位。
講真，華華對層樓就冇乜興趣，但混血名模噃，係MaggieQ、AnaR定係LisaS？
全部唔係，嗰位「名模」阿媽係馬拉華僑，阿爸係荷蘭人，楊海燕同華華講，佢噏唔出呢個混血名模拍過咩廣告，總之就係靚到係人都知佢係模特兒啦。咁華華惟有諗，呢位靚到爆嘅模特兒，好快就會紅爆變名模囉。