銀行界梁朝偉王冬勝殺入屋邨？冇錯，王冬勝噚日就喺藍田廣田邨蒲頭，仲喺一班屋邨街坊嘅見證下，為一部新設立嘅自動櫃員機舉行開幕儀式，之後仲喺邨裏面一間街坊酒樓開記者招待會㖭！
一部自動櫃員機咋喎，使唔使咁大陣仗呀？王冬勝話就係要咁大陣仗，先凸顯到滙豐幾咁重視擴展自助理財服務呢個承諾喎！佢仲即刻攞張提款卡出嚟，做呢部櫃員機第一個客，㩒咗800蚊現金，話要攞個好意頭。
㩒800蚊攞意頭
做完show，王冬勝率領成班老記，操兵咁去咗間屋邨酒樓開記招，同記者一齊飲杯茶，食個包。滙豐公關大員話，咁嘅安排係想親民啲，所以特登揀間典型屋邨酒樓，即係有龍鳳大禮堂嗰隻，配合今次主題。當華華食住個包嘅時候，突然感覺好溫馨，就好似陪緊uncle飲茶。
講番個記招，王冬勝話將會喺全港嘅商場同便利店增加自動櫃員機，下次如果喺便利店開記招，王冬勝又會唔會同記者一齊叮燒賣食呢呵？