早兩個禮拜，孫柏文約咗兩位朋友去咖啡店，一女一男。女，冰雪聰明、樣子甜美、博學多才，反應快之餘仲要對世事瞭如指掌，最厲害嘅地方就係佢細過我。男，如果用「傑青獎」年齡標準嚟界定，肯定係青年才俊，特區政府係我揸fit嘅話，一定搵佢做副局長。
當日，我跑到咖啡店時，已遲到同上氣唔接下氣，仲因為我一向唔飲咖啡，所以就買咗支水。我坐低時，兩位朋友已為早一日宣佈嘅財政預算案，進行激烈辯論。男方堅決為預算案辯護，因為女方步步緊迫。特別為預算案當中，對於入息稅稅階、稅率嘅新安排周旋。
門當戶對免蝕底
我見佢兩個拗得咁精采，就決定做觀眾睇show，開支水，一口氣劈咗佢。當我飲到一半時，女方突然問咗男方一句：「其實，你係咪交緊標準稅率？」嘩！我聽到呢句時，爭啲連水都噴出嚟。因為女方已經結咗婚，我就即時插嘴問咗女方一句：「你係咪有姊妹介紹？」女方笑咗一吓，就澄清冇呢個企圖。
不過我喺度諗，呢個絕對係一個好問題。因為如果一個男人交緊標準稅率，佢一係收入高，一係就冇負擔。其實，我呢位港女朋友問嘅問題，將會越來越多港女問。大家唔好覺得港女將會視港男做搖錢樹，佢哋只係求自保。因為上個禮拜，特區法院上訴庭，出咗新案例，話夫婦離婚，資產分配要一半一半。
今時今日，咁多港女收入高到交標準稅率，唔搵番個「門當戶對」，就會蝕底。所以，唔問清楚點得呀？
對抗反吸煙有計
噚日，睇《蘋果日報》國際新聞版，有段新聞話花旗國明尼蘇達州爆發演戲熱。據聞，當地通過「特區式」嘅禁煙條例，好多室內場所都禁煙。不過因為佢哋非常尊重言論同表演自由，所以豁免舞台上禁煙，因為唔知劇情有冇咁嘅需要。
就係咁，各大酒吧都搞「演劇夜」。酒客只要承諾參與「演出」，就可以食煙。酒吧道具部同事，就管理啲煙灰缸。有間吧直頭將「劇名」叫《BeforeTheBan》，以寫實形式描繪禁煙前嘅世界。大家可能會問：「冇觀眾，又點算係演出？」其實，世界各地都有好多「社區劇場」，為參與者抒發表現慾，做咗都冇人睇。
如果，特區都咁尊重言論同表演自由，街頭巷尾就會有一齣齣描述港人同死神慢性掙扎嘅戲。到時你流淚，唔係因為煙熏入眼。
網誌： http://phatdat.blogspot.com