活出深水埗　K20圖亡冊

奧斯卡最佳電影叫《NoCountryForOldMen》，挪用片名以喻港，近十年恰恰是齣《NoCityForOldTown》，新樓新商場儘管起到勁臭寸浮誇，對待舊區，一律爽手以英文字加數字打發，深水埗元州街至興華街一帶，「重建名」K20-22。老街坊幾十年逐吋打拼而來的基業，可被當成電腦檔案Rename完後Delete，社會如此運作法，不能怪新一代急功近利3歲就志願發達。
　　大限將至前途未卜，然而面前的日子還得好好過，K20-22區內幾十位舊街坊聯同義工，以圖畫及故事記下他們在深水埗最甜美的生活，年來引起廣泛注意，最近更過海殺入灣仔展出。「唔係集體回憶，係生活！」義工再三強調。願他們以後的日子也同樣生動而鮮活。

記者：劉嘉蕙
攝影：楊錦文

周炳光
掛洗衣賣膠轆

人家掛羊頭賣狗肉，我掛洗衣賣膠轆。呢度上手做洗衣，我頂嚟做，我做車房33年，我企喺度就係生招牌，所以使乜換招牌啫？但個招牌最近俾橫額遮住！
做車房係我志向，爸爸都係呢行，我好鍾意呢間舖，租平位置好，仲放得落我兩部靚車，一部白色老爺車MG，車牌1951亦係出廠年份、仲有部黃色開篷MINI，好型㗎，我得閒就揸佢哋去兜風，次次都好多人望，搞到朋友唔敢再坐我車。遲啲如果搬，都唔知邊度搵咁大地方安置佢哋呀。
我隻鸚鵡靚唔靚？佢叫Bobo，好嗲，有時會幫我掹鬚，不過好少講嘢。我以前養過隻綠色嘅，好多嘴，見到女仔都嗌靚女，街坊成日嚟睇佢，識佢仲多過識我老婆，餵好多朱古力同糖佢食，不過前幾年過咗身，屋企人搵人幫佢整咗個標本，𠵱家擺喺屋企，街坊仲係不時問起佢。

Nike眉的狗

養寵物係我嗜好，我喺度養過走地雞同黑色沙皮狗。試過有客喺旺角見到我隻狗，返嚟話畀我聽。點解咁都認得？我隻狗有條白色Nike眉，係細佬貪得意畫落去。隻雞呢，每日都生蛋，我會攞去畀老婆食。有排幾個中港客又試過揼低穿山甲同貓頭鷹畀我養。𠵱家去晒邊？全部送晒畀人啦。呢度都唔知幾時搬，早啲幫佢哋搵住好人家嘛。

■毛色極靚Bobo，周生話免招搖甚少亮相。

■阿女結婚，黃色MINI用嚟做花車。

蘇大揮
飲杯茶食隻蛋

影相好呀，入嚟坐呀，最近都好多記者嚟訪問。
（蘇婆婆：啱啱水滾，飲潮州茶呀！）
我阿爺嗰代開始做茶葉，爸爸喺深水埗開舖50幾年，我本來考到海關，不過爸爸想我喺茶莊幫手。前兩年佢過咗身，我同媽媽更加決心要守住間舖。
（蘇婆婆：唔好講住！等人哋好好哋飲杯茶先！）
呢排附近好多舖唔見咗，百年老字號劉成和醬園都收咗檔，真係好心酸……
（蘇婆婆：飲完喇？飲多幾杯啦，對身體好呀。）
（蘇婆婆：食隻茶葉蛋㖭啦。）
我阿媽整嘅茶葉蛋好出名，好多人專程買完茶，都問我哋有冇茶葉蛋，我哋潮州人平日就係飲功夫茶、食潮州粥、茶葉蛋就夠……
（蘇婆婆：食完喇？食多隻啦，唔鍾意食黃可以食蛋白。）
我哋真係好唔想搬呀，搬過幾次啦，見過有幾間老舖去咗第二區，熟客唔見晒，好難做落去……
（蘇婆婆終於放下茶葉蛋：搬到阿婆都驚呀！）

■蘇記茶莊，圖畫門面的燈籠最像真。

林偉強
沒有哨牙的哨牙林

我老竇先係哨牙林，我都冇哨牙！佢69年就喺度做生意，改呢個名要好有勇氣㗎，會俾人笑㗎，不過擔保全世界只此一間，唔使申請專利！
我小學五年級就喺舖頭幫手，嗰時仲聽到海浪聲，𠵱家就連個海岸都唔知去咗邊！細個去游水唔使買水泡，用車入面黑色內膽就得喇！我呢度啲車胎，幾百至幾千蚊都有，平同貴，咪又係喺地上面碌！所以人好多時都係買虛榮啫。
同樣道理，世界上有咁多間膠輪公司，間間咪差唔多！所以平時訂貨，主要係睇邊間接電話把聲好聽！如果係麻甩佬聽，就唔幫襯㗎啦。記得有間公司個女仔把聲特別溫柔，一定係好女仔啦！於是我一日打幾次電話訂貨，順便同佢傾偈。傾咗成兩年，終於鼓起勇氣，請佢睇許冠傑演唱會，為咗顯示我大方，我仲請埋佢幾個同事睇！結果？𠵱家個女仔咪係我老婆囉！嗰年佢公司仲多咗好多生意！但係老婆要收埋唔可以立亂畀你哋見。
有乜打算？唔知呀。𠵱家班街坊同政府傾留低方案，希望有得留低，喺度生活咗咁耐，真係唔捨得。