尼日利亞老千集團用詐騙信嚟呃錢嘅手法八方聽得多，估唔到最近又有新變種，今次仲識利用神秘富豪陳振聰個名玩crossover，果然夠update。噚日《南華早報》報道，最近有騙徒冒認陳振聰喺網上發電郵，內容大致係話自己個好朋友兼知己龔如心女士舊年過身，有筆1,200萬嘅滙款喺銀行度，想搵人幫手協助滙錢，跟住仲會分番啲着數畀肯幫手嘅人。
網上搵人幫手滙款
封信內容熟口熟面，一睇就知存心呃錢啦，相信啲人冇咁易受騙啩。警察公共關係科噚日都話，暫時未收到相關報案，八方估計未有人中招。不過，警方提醒市民，國際間通常以尼日利亞刑事法典中針對呢類騙案嘅條文而稱之為「4-1-9騙案」，有時騙徒會提及有富貴人家去世，要用啲秘密方法滙款；如果你一時貪心或者多手覆咗個電郵，騙徒就會同你講滙錢程序同點樣分賬。如果真係落叠滙咗錢，之後對方當然會音信全無啦，真係渣都冇得剩。
《警訊》都成日講啦，便宜莫貪，收到呢啲呃人信就應該即刻報警。不過，八方建議警方可以邀請陳振聰上節目呼籲吓叫人唔好誤信騙徒，盡吓好市民嘅責任，宣傳效果一定大增。