馮仁昭四圍超：吳尊星馬行　豪Fans平治追星 - 馮仁昭

吳尊為演出嘅電視劇《公主小妹》四出宣傳，噚日佢已經喺馬來西亞飛到新加坡，為恐fans失控，當地機場先用鐵欄杆隔開fans同吳尊，當吳尊落機後，就不時提醒fans要小心，唔好因為推撞而造成意外。

不惜淋雨等待

吳尊今次同辰亦儒、胡宇崴同利昂霖到新加坡，當地fans出手最大方，不但先飛到台灣隨行，連到馬來西亞、及返回新加坡全程都搭商務客位，目的只為咗貼近偶像，前晚吳尊喺大馬時，佢哋仲同偶像住埋同一間五星級酒店，連包車都唔係用的士，而係用平治房車，真係夠豪。
噚日吳尊一行人出席《公》劇記者會，跟住舉行DVD簽名會，大會規定只為1,000人簽名，但現場湧入2,000幾人，雖然落大雨，但熱情嘅fans寧願淋雨都唔肯走，吳尊佢哋惟有加快簽名速度，等fans唔使再淋雨。