黃貫中（Paul）與黃家強關係勢成水火早已浮上枱面，即使出席公開場合也互當透明，早前有傳二人於下月二日在好友梁翹柏的音樂會上破冰同台。阿Paul前晚出席好友樂隊的新碟記者會時表示，對同台一事毫不知情，但他不抗拒與家強同台，二人關係稍露曙光。
獨立樂隊Audiotraffic前晚在中環舉行新碟發佈會，成員主音AdriandaSilva及結他手DonCruz曾與阿Paul、何超儀及陳奕迅（Eason）等歌星合作，故阿Paul、超儀及徐濠縈都畀面撐場，吳彥祖及陳子聰也有到場。
阿Paul接受訪問透露女友朱茵在內地拍劇，故他只能單刀赴會，談到有傳他與家強將為梁翹柏同台演出，阿Paul一臉茫然反問到底是甚麼一回事，後來他說：「我都未清楚細節，冇人打電話聯絡過我喎，都唔知點解會有咁嘅講法。」
「我見慣世面」
問到是否願意與家強同台演出，阿Paul說：「我唔抗拒，但都要有通知先，真係冇人講過我知喎。」不抗拒同台，是否表示二人關係不再惡劣？阿Paul說：「見仁見智啦，我喺呢個圈咁多年，見慣世面，唔抗拒同佢同台演出囉。」
阿Paul大讚Audiotraffic的音樂水準一流，他說：「佢哋好辛苦，唔似其他人有大公司嘅支持，佢哋係香港No.1嘅樂隊，佢兩個英國人唱英文歌，香港有個好奇怪嘅現象，啲人抗拒本地英文歌，外國就會捧。」
超儀前晚因身體不適而聲音沙啞，她大讚Audiotraffic靚聲，她說：「同Eason一樣咁勁咁有男人味，阿Don支結他好犀利，我遲啲都會同佢哋合作出碟，我𠵱家派台嘅歌都係佢哋嘅作品。」
徐濠縈前晚不施脂粉現身，她說：「我唔知有咁多記者，冇化妝㖭，Audiotraffic有幫Eason做音樂，大家都好好朋友。」得悉超儀讚樂隊唱歌和Eason一樣好，徐濠縈謂：「咁犀利？冇所謂啦，佢哋咁高大靚仔。」
怕不怕Eason被拿作與二人比較？徐濠縈說：「唔會，歌路都唔同，Eason都好想唱rock嘅歌，但要顧及觀眾層面，等於佢兩個唱中文歌都笑死人啦。」
Eason女愛表演
徐濠縈與女兒的聲音都曾在Eason的唱片出現過，問她會否再幫老公錄歌？她說：「Eason唔使我幫，我唔想獻醜呀，隨緣啦，都唔想成日搬晒成個屋企出嚟，我個女都鍾意表演，但唔想表演嘅時候會黑面，有遺傳㗎。」
採訪：馬建華
攝影：陳慧安
