七人車市場鬥得厲害，打響名堂嘅都要Keep住出新款，Mazda8就有Facelifed新版熱辣到港，我揀咗最頂級嘅Luxury級！除繼承車系內櫳闊落坐足八人、穩定操控感等優點外，車首變臉、新加豪華座椅、一車三個「芒」……優點多到令我發掘足七天。
編導：徐影龍
攝影：譚盈傑
演出：Gen
最浪漫的第一天
星期日攞到新車，第一件事諗起同女神Gen吹吹風，約好一個禮拜後遊車河，真係未出發先興奮，看着那超方便電動雙趟門，忽然間神遊太虛……
在風和日麗下，載你到碼頭欣賞海天一色，嫌全車加埋九個大窗都未夠喉，瀟灑地㩒吓個Remote，開埋兩邊電趟門，讓陽光跟海風充斥車內。幻想着你悠閒地坐着，閉目會心微笑，意境浪漫，呢次我仲唔加分？
最虛榮的第二天
翌日，每每發完白日夢，回過神來，都發覺周遭目光集中在我身上，睇真啲原來係望住身邊架Mazda8咋！梗係啦，新版將車首大幅改頭換臉，鬼面罩、泵把入風口、霧燈等全部重新設計，由舊版四四方方改為斜向幾何式，登時醒目搶眼晒，企喺隔籬都沾到優越感。
最快感的第三天
今日認真啲試吓新版嘅行車表現，未計無匙系統瀟灑撻車，淨係將半自動+/-波箱由四前速改為五前速已夠吸引，跑東廊由銅鑼灣快放至北角，163匹速度感令我滿意。上橋後一個大彎故意唔減速，踩住油照去，八人大車一樣冇波Out，喺群車間穿插，連Cut幾條線，操控感之Firm甚有驚喜。
最舒服的第四天
我揸得開心，都要兼顧女神嘅舒適度。杏色內櫳加黑色仿桃木裝飾，視覺上已令人減壓，GVersion頂級Luxury更有日本原廠皮椅。軟綿綿舒服唔在講，前排電控調校兼新加暖椅，夠豪華。中排座椅變化靈活，推前拉後幅度極大，又可扳起手枕將中排兩個位拍埋變三座位，玩吓親密情侶Seat，更可將之拉下，大家輕躺着……
最享受的第五天
齋坐驚你悶，好彩G同J兩個Version嘅Luxury版均設有三個「芒」，一個TouchScreen喺中控台，一「芒」掌控全車冷氣、音響、倒車鏡頭等設備，其餘兩個裝喺前排頭枕位，令中排變成有兩個電視，齊齊睇演唱會DVD，又或者播套韓劇掀動一下女神淚腺，讓我呵護安慰一番，Perfect！
最實際的第六天
潮流興環保，我梗支持，但Mazda8最實際係依舊符合香港環保條例，出車先慳兩萬幾蚊，五前速波箱亦比舊版減低耗油量，長途車程最為明顯。GVersion更將雙氣袋暴增至十氣袋，照顧全車乘客。闊大尾廂置物量充足，嫌唔夠就摺起後排，提升一倍空間，放心繼續掃貨！
最心花怒放的第七天
準備充足，對Mazda8瞭如指掌，自信今天你有任何突發性要求，都可應付自如。點知甫一見面，你卻嚷着要一試我架新車，我好難SayNo啫！雖然你係新牌仔，估唔到揸起Mazda8上嚟仍有紋有路，你話前擋風玻璃夠大、視野夠廣，輕易睇位兼Cut線，又話軚輕腳掣靈敏，大車過彎都唔會阻到隔籬線，女仔揸大車都無問題！你一路揸一路讚，興奮到衝口而出：「不如你借架車畀我，等我日日載你返工放工吖！」嘩嘩嘩，梗係好喇，今日唔單止個天美麗，你我心情都咁美麗。咦？乜你越睇越似周麗淇，搞到我都自覺有幾分似鄭嘉穎㖭！
Mazda8規格
（G、JVersion、Luxury版相同）
引擎：2,260c.c.直4DOHC
馬力：163hp/6,500rpm
扭力：20.7kg-m/3,500rpm
傳動：5前速半自動波箱
查詢：MazdaMotor（28931112）
供款幫你計
首期：$27,550
利率：5%
年期：48個月
月供：約$6,200
＊以上數據僅供參考