瑞士除了是一個風景如畫的國家外也盛產名錶，古天樂早前因工作關係，到了被譽為瑞士鐘錶發展中心的拉紹德封（LaChaux-de-Fonds），出席國際時鐘博物館開幕活動。寓工作於遊玩的他，拿着相機四出遊覽留影，將這個被譽為世外桃源的小鎮長留記憶中。 撰文：林慧卿
位於瑞士西北部及鄰近法國邊境的拉紹德封，是一個被大片叢林包圍着的小鎮，恍如世外桃源。古天樂早前乘工作之便到該地遊玩，抱着探險的心態徒步閒逛，參觀鎮上充滿特色的建築如教堂等，享受巿內的清幽和寧靜，古仔說：「喺呢度慢慢行其實都係一種享受，空氣清新，環境又靚，而且街上車都唔多架，反而見到好多小朋友喺路上玩。」
文化氣息濃厚
古仔大讚當地的文化氣息濃厚，他說：「我經過有條專畀玩藝術嘅人喺度表演嘅街，不過我去嘅時候已經好晏，所以唔多人欣賞，但好彩仲有啲賣藝嘅人喺度表演，有個小朋友企喺隊印第安土風表演樂隊側邊睇，我覺得好過癮，仲喺後面陪佢企咗好耐先走。」
踏上拉紹德封的街道，入目盡是富特色的建築物或街道上的雕塑，令旅客恍如置身一件藝術品之中，古仔說：「歐洲最吸引我嘅就係佢哋嘅建築，呢個鎮嘅建築物多數係十九世紀同新藝術，具有獨特風格嘅建築物，無論從乜嘢角度睇都係咁靚。」
教堂石像吸引
古仔續說：「好似行去教堂嗰條街，有四個分別望住天空唔同角度嘅石像，我都覺得幾得意，雖然我唔知佢放喺嗰度有乜嘢特別意思，但當係街頭裝飾品其實都幾有特色。」
對於當地每一個景致，甚至乎街頭美食攤檔，古仔均不放過瘋狂獵影的機會，他說：「我希望影多啲靚相，放喺自己個Blog度，咁樣fans就可以同我一齊分享旅遊嘅樂趣。」
話你知：必逛鐘錶博物館
拉紹德封稱得上是瑞士的鐘錶家鄉，到此一遊，必到全瑞士最大的鐘錶博物館參觀，古仔說：「呢度係瑞士少數展示製錶工具嘅博物館，入面除咗展覽咁耐以來嘅手錶之外，仲陳列咗最近300幾年嚟嘅製錶工具，同時鐘發展嘅歷史資料，有機會嚟到一定要去參觀，必定大飽眼福。」
話你知：必買特色朱古力
拉紹德封雖然不是旅遊熱點，但仍有特色的店舖，古仔說：「呢度啲舖頭從內部裝修到賣嘅商品都好有特色，好似有間賣朱古力嘅舖頭，單係放喺櫥窗用朱古力整嘅企鵝，已經好吸引人去睇，裏面仲有好多其他好特別、好得意嘅朱古力，點可能忍到手唔買啲返嚟做手信。」
