星期日通常邊個局長最忙，梗係成日要出嚟交際應酬嘅民政事務局局長曾德成啦，因為星期日特別多團體搞活動。噚日德成局長又連跑幾場，朝早去完灣仔運動場出席全港青少年競技迎奧運，睇班後生仔做運動之後，食完晏又要即刻趕去會展參加香港道教節開幕禮，到夜晚又要殺入機場亞洲博覽館，擔任亞洲舞蹈錦標賽嘅嘉賓，真係馬不停蹄，少啲腳力都唔得。
不過，唔知係咪應酬真係太多，德成局長保得住腳力卻損耗咗眼力。噚日道教節開幕，道教聯合會嘅成員同各道堂代表着晒道袍，搞咗個別開生面嘅儀式，但德成局長喺台下睇資料嘅時間，除咗眼鏡仲要哄到好埋先睇到，唔知係咪啲老花嚴重咗呢？