中國製藥（1093）呢期企硬唔跟市跌，兼逆市上破下降軌，皆因長、短線都有point炒。中國製藥07年頭三季度（9月底止）純利飆升29倍到3.3億銀，遠遠超越06年度純利1566萬銀，07年度純利，肯定靚爆鏡。估計集團07年度純利過4億銀，PE都係得8倍單位數，業績已經有得炒。又中國製藥P/B1倍多少少，祖國同類股華北製藥（滬：600812）預期PE97倍，P/B上到10倍。同樣係製銷維生素C及青霉素，中國製藥就平咗一大截，講落後，又有得炒。
又呢期流感肆虐，中國製藥兩隻主打原料藥，應該好銷得。再講，祖國醫改，多咗同胞受惠醫保，加埋部份原料藥企業，面臨環保整改要「摺埋」，好似中國製藥呢啲大型企業，受惠醫改，優勢即時彈出，長線仲好景。係咁易以中國製藥預期PE12倍做目標，集團都要現價（2.6元）翻半番見3.9元。
遠展業績實淨到爆
遠展（035）插到落1年橫行，又有得諗。遠展08年半年度（9月底止）純利翻過半番到2.5億銀，而嚟自酒店業嘅溢利，就幾乎翻一番上1億銀水位，業績實淨到爆。連埋下半年上海物業銷售入賬，估計遠展全年度純利超過6億銀，預期PE都係得7倍幾。
再講，遠展已經計劃分拆酒店業上市，保守計數，遠展獲益12億銀，分拆消息又係股價催化劑。呢轉短打，博遠展上番50日線3.79元，回報率20%，PE都未過雙位數。