花旗股市上個禮拜愁雲慘霧，投資者對經濟前景好悲觀，伯南克叫銀行為按揭客戶削債嘅提議，更搞到人心惶惶，加埋有新嘅按揭機構話唔掂，聯儲局匆匆向市場再泵水1000億美元，人心咁亂，美元下跌嘅壓力就更大，未來推出嘅救市措施就更難達到預期目的。
港股上個禮拜都唔妥，跌咗接近兩千點，呢個禮拜會點？相信都係反覆尋底，全世界都睇實21709個位，如果確認失守，起碼都要試20000關。
另外，復活節長假期就到，炒輪要提防隨時出現引伸波幅急跌拖低輪價。
滙控C輪4748：滙控（005）現價117.4元，短線仍會係好友托市嘅主力，股價守得穩114元，有機會反彈上124元，可以小注買啲C輪4748，隻輪現價14.1仙，槓桿率8.3倍（有效5.2倍），正股升上124元，4748可見18.5仙，正股跌穿114元止蝕。