早幾日海洋公園話喺復活節搞咗個高清動物月，重頭戲係可以近距離欣賞俗稱魔鬼魚嘅鯆魚，捐40蚊畀公園嘅保育基金，仲可落池摸吓鯆魚。喺公司同啲姊妹傾開，佢哋都好有興趣，不過Joe姐擔心被魔鬼魚尾部嘅刺拮傷，「落水摸魚有冇事㗎？」
海洋公園公關姐姐解釋話，魔鬼魚只不過係泛稱，其實都有好多種，今次海洋公園展出嘅鯆魚，專登喺日本同台灣引入嘅人工飼養黑點土鯆、牛鼻鯆，性格溫馴。佢哋尾部嘅尖刺處理咗，唔會拮親遊客。黑點土鯆嗰個品種最重80公斤，牛鼻鯆重23公斤。今次呢批鯆魚，有大有細。公關仲話，為咗確保遊客的安全，公園有一套安全守則，遊客會有工作人員陪同落水，並只容許用兩隻手指掂鯆魚，所以好安全嘅。
世界自然環境基金會海洋環境保護主任朱炳盛話，魔鬼魚係好籠統嘅叫法，鯆魚係其中一種，本身性格和善，唔會主動襲擊人，受到挑釁先會用尾部嘅刺反抗。但始終係動物，最安全梗係睇吓就算，如果要掂，輕輕一摸感受吓佢就好嘞，唔好大動作干擾佢。
逢周一至周四刊出