李國寶就道瓊斯內幕交易案同美國證監會達成和解之後，雖然已經辭任行政會議成員，但事件仍然餘波未了。除咗早排自由黨主席田少開到口話寶哥哥應該辭埋立法會議員個位之外，八方聽聞，連港大都有暗湧，有教職員同學生醞釀「倒寶」，準備去信煲呔，勢要迫寶哥哥辭埋港大校董會副校監一職。
被指任副校監損校譽
有本身係校董會成員嘅港大教職員同八方講，大學嘅誠信同聲譽非常重要，佢認為寶哥哥除咗唔應該做行會成員之外，亦唔應該繼續坐港大校董會副校監個位，以免影響港大校譽。
港大副校監係由身為港大校監嘅特首委任，而且仲可以無限期連任，所以呢位港大校董已經準備去信煲呔，叫佢解釋點解唔炒寶哥哥，意圖迫向來同寶哥哥關係好好嘅煲呔表態。呢個校董仲話，69歲嘅寶哥哥年紀唔細，係時候畀機會啲後生上位。
寶哥哥01年已經獲當時嘅特首董建華欽點做港大副校監，董去曾來煲呔做咗港大校監，理論上佢唔出席港大嘅校董會會議，就會派寶哥哥做代表，由佢做橡皮圖章揼印通過議程。另一港大中人亦話，雖然副校監個位實際冇乜嘢做，一年最多開一次會，亦唔會掂到港大行政方面嘅工作，但始終具有象徵意義，人選方面唔能夠亂嚟。
事件可能再度政治化
港大校董會下星期會開會討論呢件事，八方問過有份出席會議嘅校董會成員港大學生會前會長尹翰紳，以及一眾港大高層，佢哋都冇乜特別反應，但又唔覺得要挺寶哥哥。
不過，除咗師生代表之外，港大校董會裏面仲有各政黨人士，包括民主黨嘅阿涂、民建聯嘅蔡菜子、自由黨嘅周梁等，因此事件好可能會政治化。
阿涂就同八方講，佢好理智，會睇清楚寶哥哥做呢個公職，同內幕交易案和解單嘢有冇關係，如果冇就未必需要人哋辭職喎。至於蔡菜子同周梁嘅態度，就要拭目以待喇。
mailto:[email protected]