樓市摩王黎汝遠近排集中玩商舖，連賣到㷫烚烚嘅將軍澳樓花新盤都唔見佢出手，上個禮拜佢搞大龍鳳，請一班地產代理同老友食飯，都係集中慰勞工商舖嗰瓣嘅經紀，同場仲每人送一張特製八達通，係摩王自己搵廣告公司設計嘅特別版，有翅食又有嘢拎走，樓市繼續好真係有着數。
相信好多人都收過一啲特別版八達通卡，係八達通公司提供嘅宣傳商品，今次黎汝遠嘅特別版八達通，上面嘅圖案係一個手執彎刀兼騎緊馬嘅將軍，仲有兩行字：「美聯豪傑氣 摸王俠骨氣」，話時話，就真係唔多押韻，不過相信收卡嘅美聯工商舖手足，應該唔會太過在意，只係同場嘅香港置業手足又唔知點諗呢？
華華就覺得，如果張卡真係專登為美聯而設，應該印番個騎白馬嘅武士，襯番美聯嘅獨角白馬廣告形象嘛。