政府都有話，沉迷賭博同倒錢落海冇分別，連港台都拍番套《賭海迷徒》，用病態賭徒嘅親身經歷，去告誡沉迷賭海嘅小羔羊，等佢哋唔好因為賭錢，而搞到負債纍纍。
不過，呢個世界偏偏有人唔信邪，就算自己明明係輸緊錢，都覺得有機會可以一鋪過贏番晒返嚟。華華聽聞，有位上市公司主席曾經因為賭大咗，借落一身債，搞到差啲連股東大會都主持唔到。
不時失蹤過大海
其實，呢位上市公司主席做生意好識得跟大趨勢，內房股熱時搞吓大陸地產，家陣又湊興轉型搞資源；但講到嗜好，佢就獨沽一味，就連身邊朋友都知佢得閒鍾意玩番兩手，仲久唔久就唔見人，查實係過大海玩一兩日，不過，呢位主席由於手風麻麻，因而欠咗幾百萬街數。
怕蒲頭債主臨門
不過，假假哋都係上市公司主席喎，區區幾百萬銀好小事啫──你咁諗就錯！皆因佢間公司只不過係泥菩薩，業績連續幾年見紅，仙都唔仙吓，公司冇錢，主席就更加唔掂，聽聞佢為咗避債，匿咗喺澳門幾個禮拜，電話又唔開，連公司啲人都搵佢唔到。
正所謂避得一時，唔避得一世，咁啱佢公司要開股東大會，身為公司主席，又唔係休假中，冇理由唔出席㗎，但又怕一蒲頭就債主臨門，結果佢減持手頭上嘅公司股份套現，還咗部份街數，先可以安心出席公司股東會。
計華華話，賭錢呢家嘢，有時細細哋玩兩手，過吓癮咪算囉，如果賭到周身債，仲要匿埋避債，人生仲有咩意義呢？
電郵：mailto:[email protected]