見街上的十八廿二，個個有如倒模一樣，由衫褲鞋襪、髮型到化妝，如出一轍，呢班愛追逐潮流的年輕人，有個新名字──「潮童」。咪以為叫潮童就代表好潮，其實即係話你毫無個人品味，只知跟着潮流走嘅𡃁仔。其實年輕人想引人注意，不如建立自己風格，保留自我，就由髮型開始吧。
記者：劉明慧
攝影：周旭文
斜、碎、M、V乜蔭都有
80年代標準夢中情人，就是「齊蔭」直髮周慧敏的玉女形象，回顧那年代的MTV，個個女生都一模一樣叫潮流，現在看來卻大叫「老套」。但明明街上10個有8個女生都是楊丞琳式「齊蔭」，前額跟當年一樣厚厚一片，為甚麼卻是最新潮流指標？17歲做售貨員的Joey：「佢哋啲蔭有好多變化，如斜蔭、碎蔭、埃及妖后式齊蔭，仲有好誇張嘅M字蔭、V字蔭……」同是17歲的學生Charmaine：「我之前喺旺角都見過有男仔剪M同V字蔭，跟住摷到個頭好鬆。我學校都有男同學剪短到眉上嘅齊蔭，女仔就長過眼，返學夾起佢就得。」
忌做MK人
雖然Joey、Charmaine及Sky都知潮流興齊蔭，但居然無留，且態度帶點不屑。Sky：「因為要返工，加上頭髮長咗，所以都比較少去整頭髮，最多染啡，M字同V字蔭就唔敢試喇，怕被人標記為MK人。」兩個女孩子亦覺得，「齊蔭」髮型已經退出潮流舞台，Charmaine：「返學唔可以太誇張，而且長直髮分中間界，再剪layer就已經好好睇。」Joey則覺得要適合自己：「唔係個個剪齊蔭都好睇，最緊要啱自己面形，個個一樣會好無特色。」
駁髮電髮玩變化
要打扮入時，Joey及Charmaine都花盡心思，就算留長髮都常有變化，Charmaine：「返學無得揀，只可以紮馬尾，想特別就試吓駁髮。出街嗰陣捲起前額嘅蔭，再夾實就得，髮尾就用gel整成曲髮效果。」Joey就選擇電髮：「我之前都係直髮，𠵱家電攣咗，加埋駁髮，咁就會令頭髮多啲layer，感覺無咁死板。」
潮人變潮童
年輕人都希望自己是人群裏最「潮」嘅，但追隨潮流，所費不菲，而且效果未必個個好，最後只會變成一個又一個倒模，好像旺角街頭、尖沙嘴海旁，就出現好多十八廿二潮人，即Sky口中提到的「MK人」。Joey：「佢哋多數電髮電到有少少爆爆哋，男仔頭髮會較長，染成七彩顏色似Punk頭，又剪平蔭、V或M字蔭，後面再電攣。」Sky：「就好似標誌咁，個個都差不多，仲要覺得自己好潮，所以被笑做『潮童』。」