世事無奇不有，父母供子讀書，斥資近百萬元，讓次子到英國留學，得工程碩士學位，次子回港後，與父母同住，後來（二○○○年），次子結婚，父母用一百三十二萬買入青衣翠怡一個單位畀仔住，○三年生咗個孫，由父母照顧，次子月給一萬四千元做家用。二○○五年，次子請了印傭，不再回父母家吃飯，孫女亦接回家，不再由阿爺阿嫲照顧，並將家用降至七千五百元。
父母因此與次子興訟，索還學費八十八萬餘元，法庭判父母勝訴。父母告兒子追還學費，起因為兒子不按照口頭承諾畀家用（當作分期還款），以後父子親情斷絕，良可嘆也。以前講過，上茶樓飲茶，父攜子來者多，子攜父到者稀，子女長大成才後，視父母如街外人，唔知係唔係新一代人物之特徵。按報紙報道，次子生於一九七○年，中學會考成績勉強，重考無進步，到電子廠做學徒，後轉煤氣公司做學徒（一九九○年），讀夜校，成績唔錯，父母於是送佢到英國攻讀，成為碩士及專業人士，可見父母十分苦心。
不過俗話有云，施恩勿望報，現代父母如果仍然認為積穀防饑，養大子女成羣作為自己退休保障嘅，千祈唔好，抱此期望者，往往會十分失望。養大及培養子女成才，當作報答自己父母培養自己可也，上一代養下一代實為常規，希望下一代養上一代，未免大想頭一啲。
現實一啲講，我哋雖然冇資格學蓋茨，畢菲特，冇佢兩位咁多錢捐出去，但佢哋嘅精神值得學習，就係培育子女，讓子女得到現代社會起碼嘅求職資格之後，就唔應該把遺產留給子女，財產只係畀自己一對老夫妻享用，身故後就將啲遺產捐晒畀自己鍾意嘅機構、大學、中學或者慈善機關，悉隨尊便。當然亦費事向兒女追債，追回學費，免傷家庭和氣。左丁山當年讀完大學，老竇立即講：「你要再讀碩士，唔該你自己搵錢讀」，於是去搵工做，直至好彩攞到獎學金之後，先至一世人第一次坐飛機飛出鯉魚門。同舊日比較，今日啲細路，幸福得多咯！