城大法律學者梁美芬舊年當選九龍城區議員，有意再下一城出選立法會，覬覦九西議席係公開秘密，當田二少仍然猶抱琵琶半遮面之際，佢已經搶先熱身，噚日借頭借路，以慶祝三八婦女節名義搞花車巡遊，花車由美孚出發，經深水埗、旺角、何文田、黃埔去尖沙嘴，幾乎行勻全個九龍西選區，沿途大派鮮花禮物，十分大手筆。
有地區人士透露，阿爺今次擺明畀隻好牌梁美芬上，早就為佢鋪橋搭路穿針引線，發動九龍西多個地區社團幫佢造勢，最近梁美芬以環保促進會主席身份，帶領多個社團、區議員訪問肇慶，目的係合力打造一個和諧保育新西九，如果梁美芬話無意參選，真係唔知有幾多人信。