本應一早就要搵錢嘉樂呢個由R32到R34都擁有過嘅戰神迷一試，可惜新一代戰神到港時，嘉樂正在日本拍戲，到佢返嚟香港，啱啱就撞正日本改車公司「Mine's」嘅530匹改裝版本GT-R到港。開正佢嗰瓣，即刻度期約佢試車！佢就話要拉埋A1方程式中國隊嘅香港車手李英健齊齊玩新玩具。戰神中嘅戰神，530匹喺香港嘅第一就咁畀咗你喇。快，唔係得個講字嘅。
文：嘴嚼爺
攝：伍慶泉
白色惡魔遊東廊
新款GT-R香港熱賣，據講日本缺貨都係皆因被本地車行掃貨所致。未食完已經翻尋味嘅富利堡啱啱同日本Mine's合作，喺日本運一架改裝過電腦、Brake碟、排氣喉嘅GT-R到港。由480匹增至530匹，唔係玩緊數字遊戲，而係創緊極速傳說。錢嘉樂、李英健一人一轉飛東廊，未開車筆者已經話：「唔該等陣慢少少，俾攝影師喺側邊影吓好噃。」「好呀好呀。」好完之後，一上到東廊，坐後座嘅筆者隱約聽到一句：「呢個時候真係唔係好適合試車……」之後已經冇再喺後鏡見到攝影師架車……
單手贏911Turbo
錢：一聽見話改到五百幾匹，我已經同你講：「喂，會唔會係Mine's？」真係比我估中。
李：改到五百幾唔係重點，係個半自動波箱承受到五百幾先犀利。
錢：（同記者講解）480匹同530匹都會試到個分別，你畀啖油，個電腦反應會唔同。
李：喺香港就冇可能試到個極速，但試到個波箱好好。
錢：終於感覺到佢點樣贏911Turbo，2,000轉就嚟料，好多Turbo車都要高轉先有嘢。
錢：嘩，咁舒服就可以咁快喇，如果揸我嗰架要做好多動作，好忙㗎，𠵱家多隻手可以摸隔籬隻大髀㖭。
李：吓？你想摸我咩？
錢：……
李：用隻腳摸都得啦，隻左腳都冇嘢做。
錢：但係我始終都係期待VSpec.棍波版。
李：俾我揀，我一定揀自動波，我覺得自動波已經好夠玩。
錢：棍波多好多樂趣，我哋學過賽車嘅，好多時比賽贏輸就係計邊個做錯得多嘢。
李：係，賽車嚟講棍波車多啲人為因素，電腦唔會錯，但係人會錯。
錢：可能我唔甘心俾架車控制一切啦，幾年前已經同爾東陞傾過呢個問題，連F1都用半自動波喇，有棍波就好揸喇，可能我哋下一代都冇棍波呢樣嘢。
李：以前就話自動波唔夠棍波快，𠵱家科技先進，呢架雙極力子㗎呵？棍波同自動波，要係好真正嘅高手先會有少少分別。
錢：哈，呢啲速度錶，去到80km/h都係喺低位，點睇呀？
李：係呀！如果我買咗呢架車，應該兩個月內個牌都冇埋。
錢：我就唔驚，因為我節制能力高，學賽車嘅喺街唔可以片，要做個負責任駕駛者。
經典歐化變豪
李：真係好力，一畀油道力就嚟。好驚喜，估唔到個波箱反應真係咁快，而且Lag好少，你睇，上斜個Lag都唔覺，好犀利。
錢：真係幾好玩嘅。其實呢架車家下已經可以落得Track。
李：個Brake街行好夠，但落Track驚佢會過熱。喂，你滿唔滿意？
錢：我對呢架新一代好滿意。我好期待，因為佢暫時未真正參加GT500嗰啲比賽，真係希望佢可以延續番GT-R嘅傳統。
李：我係多過滿意。唔怪得東京車展嗰時，全世界嘅人都話08年係呢架車玩晒。
錢：R32布座椅永遠唔夠同級車Supra、RX7咁豪華，好似唔值70幾萬，其實所有錢放咗喺性能上面。新一代揸感好硬淨，唔似得Supra、露筍嗰啲咁輕飄飄。
李：係，今次連個內櫳都好豪華。
錢：你揸開歐洲車嘅都會鍾意？
李：呢架GT-R已經好歐洲化，有啲德國車嘅感覺，已經係一架高檔嘅跑車。而且我好鍾意個車頂線條，好靚。
錢：全車最有GT-Rfeel就係個車形，車頭長長，仲有車尾4盞圓燈都係經典。
李：仲有今次改咗車尾兩對喉，好靚。
錢：係，我估冇幾皮嘢都買唔到。
物有所值要講價
李：一定要我雞蛋裏面挑骨頭，係覺得隻尾翼怪怪哋。
錢：我就話個後座囉，頂頭。
李：你實買呢架新GT-R㗎啦，咁留唔留番𠵱家架R34？
錢：留，上一代個引擎同成架車嘅感覺係經典，我鍾意GT-R，真係睇十年八年都仍然覺得好靚。
錢：講到尾，新一代好易揸，應該係話好易揸得快，就算真係揸架棍波嚟比，都真係要個技術差別好大先會分到勝負。
李：係，舒服到可以日日揸。
錢：我會買，一定會買，但可能等吓先。呢架唔同蓮花呀、林寶呀，嗰啲就最好朋友買，我得閒就借嚟玩。
李：哈哈，喂，你返車行落訂啦！
錢：你想買？
李：真係有衝動……
錢：（同記者講）佢衝動過我啦！佢呢啲公子哥兒嘛。
李：我邊有錢！
錢：你冇錢？我唔信，睇吓你啲錢擺唔擺喺呢度啫。
李：不過佢有呢啲科技，造價真係應該唔平，尤其個波箱。
錢：我明白係物有所值嘅，但個價真係跳得太多。如果50萬我買兩部！
Profile
引擎：3,799c.c.DOHCV6twin-charged
馬力：530hp
扭力：60kg-m/3,200-5,200rpm
傳動：6前速半自動波箱
查詢：富利堡（23330747）