噚日三八婦女節，陳太同一班女fans暢談做女人之道，佢以前係高官，𠵱家做議員，話香港女人壓力大，隨時俾家庭、工作壓到透唔到氣，好多人會去Shopping減壓，陳太都話呢招使得，不過仲有一種減壓良方，唔使錢嘅，就係大喊一場。
陳太曾透露回歸前因為要承受中、英兩面壓力而落淚，可見呢位「香港鐵娘子」都有感性一面，佢噚日話喊係減壓良方，如果姊妹遇到生活上壓力，不妨大喊一場，流眼淚唔係懦弱、羞恥嘅事，喊咗出嚟，咪舒服晒囉。
幾百蚊件衫仲實際
好多女士（其實男士都係）鍾意購物大出血減壓，陳太都話行街係減壓方法，荷包輕咗，壓力都可能隨之減輕，不過佢話「血拼」要節制，佢𠵱家好少買幾萬蚊件貴價衫，因為呢啲衫只可以着一、兩次，趁減價買啲幾百蚊件嘅衫，可以經常着仲實際。
平衫貴着係考驗個人品味挑戰，陳太將自己着衫之道傳授姊妹，佢話唔好盲目追求名牌，亦唔好扮後生，係咩年紀就着番同年紀相符嘅衫，40歲可以扮得好靚，60歲都可以好優雅。八方相信陳太冇乜弦外之音，其他阿太唔好對號入座。做女人要化，唔係睇化，係化妝個化，陳太自言平日愛化淡妝，「我唔鍾意化到好厚粉。」講扮靚唔可以缺少髮型，可惜陳太冇同姊妹分享恤髮之道，美中不足。
理財緊記量入為出
以前女人靠男人，𠵱家財政獨立，陳太話女人要識得理財，佢理財之道好簡單，就係《基本法》第107條──量入為出；佢又話阿媽教落要積穀防飢，搵10蚊收入，最多使7、8蚊就好，其他要儲起佢，如果係家庭主婦，更加要力求收支平衡，避免赤字。
近年人人都要纖體，陳太可能得天獨厚，咁多年嚟都保持身材苗條，佢話秘訣係要食有營養食物，高卡路里、高脂肪、低纖維嘅快餐可免則免，佢指香港人工作忙碌，平日要食餐好嘅都唔容易，可能一日幾餐都要食快餐，咁對身體唔好，所以建議姊妹要識得錫自己，工作幾忙都好，都要抽時間煮啲有營養嘅嘢畀自己食，如果飲食均衡夠營養，唔使食補品都好似佢keep得咁好。
電郵：mailto:[email protected]