近日紅魔氣勢如虹，不但在英超力追阿仙奴，於歐聯戰線亦輕鬆打入8強。今集〈讀者激鬥〉，就集中討論今晚由曼聯對樸茨茅夫的英足盃大戰，戰情更非一面倒；事關其中一位參加者就指曼聯分分鐘留力，戰意未必及得上老樸。
M：Mike 藍：藍鑽石 邪：邪童 V：Victor
M：今次嘅參加者係邪童及Victor，邊個想講先？
V：我呢啲新人，梗係讓畀前輩啦。
邪：唔係，學無先後，達者為先，你有point咪講先囉。
藍：嘩，都唔使我哋講，自動波就嚟。
V：唔得，要讓㗎，好似AC都要默哀啦。
藍：又關AC事？
紅魔出「二隊」都夠贏
邪：好啦，我先。我都好認同兩位主持所講，今仗曼聯會收起部份主力，可能C朗都未必出，不過「二隊」就夠贏你啦！尤其是老費好鍾意將泰維斯放喺「二隊」作為主力，佢每次表現都唔錯。季初雖然雙方打和，不過睇番近年賽績，都係曼聯佔上風。
V：果然係前輩，30秒預得好準。我就咁睇，樸茅今季喺英超聯唔上唔落（暫排第9），𠵱家梗係集中火力爭足總盃；加上曼聯預計會留力，更加應該捧對家。我覺得以老費嘅經驗，會先勒一勒曼聯，等遲吓再衝過。我都唔會博曼聯輸，和波合理啲！
M：唔係呀，你都好準呀。好，交過波畀你兩個喇！
V：曼聯唔使講啦，個個都話贏梗，你又覺得紅魔會點贏法？
邪：小勝喇，一定要買「讓球主客和」嘅「和」。好似我之前講，曼聯「二隊」都有泰維斯壓陣，而且冇咗C朗，對手冇咗防守嘅焦點，更加難以抵禦紅魔進襲。
V：你識咁諗，老樸領隊都識諗啦！
邪：但係你「嘜」得邊個先？
V：話晒老樸喺英超都算中游球隊，之前曼聯都輸畀曼城啦，反而老樸之前對曼城都係和波啫。
老樸個「心」放喺足總盃
邪：踢波點可以咁計㗎。
V：仲有，老樸個「心」喺度嘛，佢哋肯定全力爭呢個盃，唔似得曼聯咁一心二用。唔好唔記得老樸作客成績幾好㗎，作客入球仲排英超第3㖭。
邪：曼聯主場夠勁啦，佢哋後勁仲好犀利，成日都最後關頭入波。
V：我都認同曼聯好勁，所以我波膽係老樸和波1:1，同你估嘅曼聯贏2:1都係爭一球啫。
M：好啦，時間都差唔多啦！
藍：你兩個睇嚟要約出嚟再拗過喇！
M：Victor就夠晒咄咄逼人，不過好似邪童有point啲。
藍：既然係咁，我哋就支持紅魔贏老樸啦。
藍鑽石：AC出局仲好
AC出局搞到我被萬民圍攻，如果睇開我寫稿，都知我呢個AC躉唔滿足於隊波現況；家陣輸畀隊勇於革新嘅阿仙奴，簡直係照妖鏡，長遠睇係好事。希望納比或者摩連奴快啲代替肥安啦。仲有，今場歐聯我無叫人買AC㗎！
藍鑽石心水推介
星期六7曼聯2:0樸茨茅夫（5.5倍）
星期六15利物浦1:1紐卡素（7倍）
星期日22新特蘭1:1愛華頓（6.5倍）
為13萬派彩默哀
今集藍鑽石呼籲各位讀者為出局的AC米蘭默哀，想不到第1個響應的是Alan，不過他是為自己的12萬多的「6寶」默哀。
事關Alan之前買「6寶」中五關，可惜頭關錯押AC主/主，最終事與願違，眼白白看着阿仙奴憑法比加斯及艾廸巴約的入球，以2:0勝出；此戰果不但粉碎了AC的衞冕夢，也令Alan眼白白看住近13萬正獎獎金流走，只收回718元的安慰獎。
Alan亦分享買「6寶」的心得，他指馬會選得英冠英甲，多數有冷味，大可用較冷的一方為重心。希望Alan沿用這條方程式，下次捧走「6寶」正獎吧！
Alan貼士
星期六7曼聯2:1樸茨茅夫（7.5倍）
星期六15利物浦3:1紐卡素（11倍）
星期日22新特蘭2:2愛華頓（14倍）
向全港利記迷道歉
上次在節目中猛踩利物浦的阿樂，今次就在節目中，向全港的紅軍迷道歉，並謂自己只是一時激動，其實都很欣賞利記，佩服他們當年憑鬥志在歐聯反勝AC。
雖然如此，阿樂今集仍然支持紐卡素可以作客壓倒利物浦。Mike就笑罵阿樂「虛偽」，一方面道歉，一方面想利記輸波。
阿樂就為自己辯護，支持紐卡素純粹是鋤強扶弱，而且利記有歐聯後顧，不值得捧場。
Mike最後代利記迷接受阿樂的「耍冧」，亦都叫他不要太認真，睇波支持自己愛隊無錯，不要亂咁踩其他球隊就ok。
阿樂貼士
星期六7曼聯3:0樸茨茅夫（8倍）
星期六15利物浦1:2紐卡素（26倍）
星期日22新特蘭1:0愛華頓（8.5倍）
送你阿仙奴長袖Tee
下集以webcam打入嘅讀者，除咗會由我哋幫你買3串7波膽，講得最好嘅讀者，更加會得到阿仙奴長袖Tee；獎品咁豐富，仲唔即刻上網登記？
〈拉闊足球場〉下次舉行日期：13/03
想參加？即上 http://soccer.atnextcom/jp/soccer
節目重溫： http://sport.appledaily.com
