港珠澳大橋傾咗好多年，卒之省港澳三方政府拍板落實，不日招標，約五年後有望落成，到時由赤鱲角機場揸車去澳門，半個鐘頭內到達，由中環去，只需一小時。最開心嗰位，相信會係賭王何鴻燊，每日穿梭港澳視察業務，話都冇咁易。
香港酒店老闆（業主）就好唔高興，酒店管理公司（如果在港澳兩地都有酒店者，例如文華）就態度中立。點解呢？因為到時澳門酒店可派中型巴士及名貴房車到赤鱲角接客，由機場直奔澳門，仲快過我哋喺成田機場落機坐巴士去新宿或者六本木嘅酒店。澳門酒店又大又靚又有豪華賭場，吸引力十足，住落之後，可坐酒店車嚟香港購物，你話幾方便呢。香港酒店業主就激氣咯，一位業界人士話：「香港特區政府要出一半錢嚟興建港珠澳大橋，明益澳門MICE生意（即會議，獎勵旅遊，大型國際會議及展覽），對香港有何利益，冇人話得出。澳門駛乜起機場啫，赤鱲角機場就係澳門機場啦。」
咁講法，機管局會有得益嘅，國際旅客去澳門，選擇在赤鱲角出入，機管局嘅生意會多咗，但除此之外，港珠澳大橋對本地酒店、旅遊無甚好處，反而成為澳門搶香港生意的最佳工具。有人話，物流業掂喎，有咗港珠澳大橋，可同時興建十號貨櫃碼頭。咁講法，Out咗嘞，𠵱家時機不合，一來東莞出現工廠逃亡現象，東莞樓價大跌，以後少咗貨物經由香港輸出，二來深圳港口嘅貨運量高速增長，香港貨櫃碼頭增長率如蝸牛爬行，在未來十年，深圳鹽田港、蛇口、大鏟灣成為珠三角貨物出口主流港口，香港貨櫃碼頭只會係輔助性碼頭，珠海中山一帶，邊度有咁多貨物出口，足以支撐香港十號貨櫃碼頭呀？問吓人，就知道現在葵涌個貨櫃碼頭仲有唔少空置率啦。日本管理學大師大前研一喺五年前就已經話香港嘅物流中心地位，遲早玩完，興建港珠澳大橋倘為物流而設，不妨喊幾聲。