中鐵建（1186）下周四（13日）上市，但影子股中鐵（390）炒唔起，噚日跟隨大市下跌4.9%，收市報8.34元。究竟係咪影子股概念已經冇得炒呢？
朱：朱紅 孫：孫柏文
黃小姐：我8.5蚊入咗中鐵。
孫：你認為有乜嘢動力推佢上去？
黃：我認為佢唔受宏調同美國次按影響，風險較細。加上佢由高位一路跌到𠵱家呢個位，相信都應該見底。下個禮拜中鐵建上市，會唔會對佢有啲好處呢？
朱：之前揸咗中交建（1800）、中鐵嘅人，喺呢啲位上升空間唔多，會考慮沽咗啲股，套現買消息比較多嘅股份，所以𠵱家未必有炒影子概念，但你講得啱，中鐵股價跌到𠵱啲位，真係好吸引。
黃：呢個位算唔算下調空間比較窄呢？
孫：按基本分析，就算落到八個幾都仲係貴，即使落到四個幾我都覺得仲係偏貴。除非佢未來幾年都可以交到好業績，先至值呢個價。
黃：有冇機會喺呢個月內升番9蚊啲位？
孫：如果中鐵建上市後真係升得好靚，咁就中鐵都可以上，同時中交建亦可以上。
--九龍塘黃小姐個案--
買入價：8.5元
目標價：9.3元
止蝕價：8元
時期：三個月
招商銀行（3968）
走一轉冇難度
關公：今個星期個市埋單計跌咗千幾點，都係建議買啲穩陣嘅實貨，進可攻、退可守，我喺24.55蚊買咗招商銀行（3968），睇28蚊，有幾蚊水位，現價走番轉應該冇難度！
孫：招行試過幾次都跌唔穿現水平，不過走勢已呈現好靚嘅下降軌，技術上唔係咁好。
朱：好多人都認為招行係中資銀行股嘅首選，但都要留意大市氣氛，𠵱家買落去可能要守一排。
關：我之前都走過一轉，我覺得下星期應該可以去到28蚊食糊，𠵱個星期大市跌咁多，如果兩會冇乜壞消息，下星期個市應該會上番去。
孫：我反而認為除非有好消息宣佈，否則個市應該繼續跌落去。
關：我都唔貪心，上番少少就會走，希望下個星期個市會好啲，一齊收錢啦！
--大埔關公個案--
買入價：24.55元 目標價：28元
止蝕價：— 時期：—
恒指熊證（7272）
恒指見二萬一
Joe：我開市冇耐喺0.45蚊入咗隻恒指熊證（7272），呢隻熊證打靶價喺24000點，你哋點睇？
孫：恒指跌到乜嘢位你會走？
Joe：跌到21000點，佢應該可以上到7毫子，今晚美國出就業數據，之前啲數據咁差，今次都唔慌好，個市下星期一仲有得跌。
朱：可能美國政府又有救市措施出，你怕唔怕？
Joe：就算救市都係止吓血，救唔到幾多。
孫：雖然恒指都幾難升上去，但你怕唔怕會真係可以上番去24000點？
Joe：暫時都唔怕，滙豐業績咁靚，都上唔番去24000點，𠵱家公司啲業績越好，沽壓越大，好多投資者借消息出貨。買股票係買未來，好似港交所（388）咁，今年業績一定差過舊年，投資者實沽。
--荃灣Joe個案--
買入價：0.45元 目標價：0.7元
止蝕價：— 時期：一星期
