麥浚龍最近推出新碟，忙於宣傳的他工作排得密麻麻，不過他突然向唱片公司請假三星期，其理由是到外地籌備新唱片，無巧不成話，其緋聞女友阿嬌也向公司取得兩個月假期，有指近日阿嬌已開始放假，她只對同事表示出外進修，但詳情欠奉。
將往美日兩地
記者昨日致電Juno唱片公司SillyThing高層Raymond求證此事，他承認說：「呢個係一早嘅安排，唔係突然嘅，因為Juno要去美國同日本進修跳舞，其實係去十日啫，冇三星期咁多，佢主要係去美國學跳舞，而日本係去搞啲服裝問題，順道去搵排舞老師阿Sam，之前佢首《愛上殺手》嘅舞都係阿Sam幫手，佢哋仲要傾吓有乜新舞，Juno年尾會再出新碟，到時會以跳舞為主。」其實Juno日前剛出新碟，現正值宣傳期，忽然請假確實耐人尋味。
阿嬌又剛巧向公司請假，問Raymond是否Juno急於陪佳人？他笑說：「冇咁嘅事，唔會啦，冇可能，Juno喺17號就返嚟，因為佢有嘢做。」一向cool爆的Juno近期心情靚靚，是否因蜜運成功？Raymond說：「佢一向心情OK㗎。」談到Juno將會接拍新片，問阿嬌可會參演？他說：「呢部係男人戲，度卡士時唔知仲有邊個，部戲係拍《破事兒》時候傾嘅。」
霆鋒派定心丸
此外，蘇永康昨日到奧海城出席活動，他表示前晚與謝霆鋒通過電話，謂栢芝情緒很好，他說：「霆鋒同我講『得啦，冇嘢，定啲嚟』。」康仔認為今次事件包括陳冠希在內均是受害者，希望傳媒不要再追問此事。問到栢芝是否懷孕？他說：「我冇問，有就至好。」
採訪：林妃