2008年的今天，色慾橫流。
年輕的一輩對「愛情」的定義與上一代差之千里，像童話一般的愛情故事彷彿早已消失於世上。偏偏娛樂圈仍舊製造童話，螢幕情侶一對接一對，近兩年有方力申和鄧麗欣。是童話仍然存在？還是霧一般的緋聞只是經理人公司的糖衣包裝？對於曾受愛情重創的方力申來說，現在追求的是平淡真摯的愛情，有情人可以白頭偕老。 撰文：藍文浩
解構阿嬌：真我不等於形象
港大畢業、香港泳界代表、以一身陽光氣息、公子哥兒背景加入娛樂圈，條件優越，偏偏方力申緋聞一隻手數得晒，一個同公司叫鄧麗欣，一個叫阿嬌鍾欣桐。負面新聞也不多，要數，就數最近因淫照事件之名而再度炒熱的女藝人半裸手機短片，被傳是拍攝者B先生，對身家清白如王子的他來說不可謂不是一個打擊。
方力申對此說：「都擔心㗎，上網睇到連內地都有人講，又有啲廣告商開始問，仲有啲人搞抵制方力申行動。」跟平常一樣不慍不火，喝着西柚汁的他說着：「公司打算向法庭申請一份判詞，一對年齡就知『真兇』係唔係我啦。」
觀眾要有判斷力
被淫照風暴波及，方力申也算是「受害者」之一，有評論認為是因為經理人公司過份堆砌藝人形象，令曾與他傳過緋聞的阿嬌比陳冠希「輸」得更慘。但他卻認為雙方都要負上責任，又為形象一詞立下註解，他說：「我覺得藝人形象唔一定需要同自己本身係同一個人，如果唔係都唔使叫做形象啦。觀眾應該要有判斷力，可以選擇信或者唔信，自己思考一吓。」到底是仗義為舊緋聞女友講好說話？還是暗示他本身也有另一個「形象」？
拍拖一定唔公開
而最近方力申的「情敵」葉念琛就為他設計了一個壞形象，在新片《我的最愛》中，他不再是純情小白兔，而是化身賤男呃女人錢。方力申認為導演葉念琛很為他設想，他說：「雖然外間話我同佢唔啱，但係其實我好欣賞佢，佢觸覺好敏銳，佢話呢個角色唔似我，但係如果做到嘅話，我以後嘅戲路會闊好多，我都希望大家有耳目一新嘅感覺。」
一而再，再而三與分不清真假的緋聞女友鄧麗欣扮演情侶，郎才女貌被捧為一對非常合理，不過方力申卻對與圈中人拍拖有保留，他說：「如果係圈中人，就一定要用好多時間去了解，個個緋聞都多到爆，就算係霧水情緣都死啦，反而圈外人就唔使擔心咁多。如果我同圈中人拍拖嘅話一定低調第一，唔會公開，出面全世界都想你哋唔好嘅，公開冇意思囉。」
不輕易公開戀情，除了因為怕受盡香港畸形娛樂圈生態的龐大壓力之外，只因他有着渴望細水長流的傳統思想，而非時下的easycome,easygo觀念，他說：「𠵱家冇咁容易去鍾意一個人，可能識嘅人多咗，生活經驗又多咗，最緊要係信得過同溝通到，我想追求感情上穩定啲嘅生活，𠵱家唔夠時間同精神去應付刺激嘅感情喇。」
慘痛經歷：唔敢揀好強女仔
愛情當中充滿了妒忌和猜疑，方力申自言無力應付，《我的最愛》英文譯名「LforLove,LforLies」正道破了他對感情的擔憂，他說：「有靚女經過我都會望、都會睇，但係𠵱家會唔敢揀一啲好強、具侵略性，好惹人注目嘅女仔。」活在不平凡的娛樂圈，五光十色令人目眩之後，所嚮往的就是平淡穩定的生活。
望細水長流
方力申續說：「我希望細水長流，感情穩定，不過當然，我𠵱家都係28歲，仲係好細，可能之後遇到一段好精采嘅感情都唔定。」是由於過往的悲慘經驗而令愛情觀有所改變？他咬着飲管眼神在回憶從前：「都係㗎，以前拍拖好投入，一直不斷付出，但又希望可以收番同等回報，結果當然係唔一樣，付出得多受嘅打擊就越大囉。𠵱家自己愛一個人嘅方式唔同咗，老土啲講句就係得珍惜兩個字，希望我鍾意嘅人永遠都可以留喺身邊。」
方力申提起了陳奕迅的一曲《CryingintheParty》，他說：「以前拍拖真係太過投入，所以對自己好大傷害，所以我好鍾意入面呢兩句歌詞，『年輕的眼淚流光了，便掛念曾經這樣了』，真係好貼合我當時嘅心情。」黃偉文填的詞讓方力申有感而發，藝人只是一種職業，步下舞台的他也是普通人一個。
當方力申喝完了他的西柚汁，在陽光普照的初春中午拍照時，筆者心中有一道音樂響起，當中唱着「我也曾像這樣，青春大概相似，總有段情落入這種困局。」
攝影：陳俊強
髮型：VincePang@ILColpo
服裝：N4E1（notforeveryone）
