葉劉噚日為徒弟黃楚峰喺筲箕灣新辦事處主持開幕禮，佢話今年9月出選港島區，會同黃楚峰、陳岳鵬三師徒一齊參選，兩個人冇乜機會當選，志在畀佢哋曝光，攞啲參選經驗。葉劉全方位備戰9月選舉，下個月開始會隔星期三晚喺筲箕灣辦事處會見市民，又大搞街坊活動，包括香薰美容、手撕紙手工藝班等，擺明吸婦女票。
冇政黨搵佢傾協調
盛傳民建聯曾鈺成轉戰港島，葉劉話雙方票源好唔同，所以佢未驚過，又話至今未有其他政黨搵佢傾協調。葉劉去馬意志堅決，其他人搵佢傾都多餘，況且要傾點樣配票，搵共產黨傾仲直接啦，唔使勞煩葉劉。
葉劉透露計劃月內上京，唔係為選舉問前程聽指示，而係帶中小企業商人去北京同天津，安排佢哋同商務、勞動部門官員見面，反映對內地新勞動法意見。葉劉雖然獲阿爺器重，但應該未有直達天庭功力，據講舊年訪京時被冷待，所以葉劉今年再上京，獲邊啲官員或邊個級數領導人接見，可以視為佢政治行情升跌指標，葉劉話訪問團具體行程待定，暫時未知會見到邊個官員。