600匹火辣賓利到港　嘆英式HighT

GT-R炒熱車界，緊接而嚟仲有凌志ISF，日系跑車氣勢如虹，到今日終於輪到歐系發威。雖然新車嘆嘅係英式典雅風味，不過今勻賓利並非請我HighTea，而係HighContinentalGT車系個「T」！呢個T絕不如其外表般溫文爾雅，骨子裏配搭6,000c.c.W12引擎，600匹馬力仲要係雙Turbo，爆發起嚟就如《Rocky》入面嘅Mr.T般拳拳到肉！

記者：徐影龍
攝影：楊錦文

乜都第一

代理一口氣返咗ContinentalGT車系標準版同Speed版兩款到港，而屬頂級嘅Speed版更成就咗香港賓利史上多個第一：首架達600匹馬力、首架極速達326km/h、首架火紅車身等，其規格之高突破賓利專造成熟穩重豪轎嘅形象，超級跑車本色表露無遺。ContinentalGT車重達2.35噸，能做到上述嗰堆咁頂峯嘅數字，最主要原因係配搭咗6,000c.c.W12引擎，以及TwinTurbocharged系統，而且整體經過重新調校，令0-100km/h縮短至4.5秒，極速更達326km/h，真係打機都未必得，以重量級車身嚟講，呢個數字實在相當之恐怖，亦令我相當之High。
咪以為Speed版咁勁就睇小標準版，佢一樣配備W12＋雙Turbo引擎，馬力都達552匹，0-100km/h都只係4.8秒咋！

■ContinentalGT車系不會高調賣弄霸氣，反而成功將英式典雅融合超跑中。

■車身設計偏向斯文，最惡已經係車頭鬼面罩及氣壩。

■車尾設計不會太橫向，最欣賞其雙氣喉，睇真啲其實係四出式設計。

實淨穩重Classic味

一味加大馬力玩極速，咁實在太膚淺喇，賓利當然唔會忘記自家豪轎本色，大量Classic風味裝飾及至豪設備擺晒喺ContinentalGT車系。全車至靚格仔真皮唔在講，襯埋中控台、錶板等木紋裝飾，已充滿視覺享受，實際試坐過亦感覺到ContinentalGT車系嘅實淨穩重感，坐喺司機位唔會好似俾桶椅逼實咁，Fit得嚟仍然好舒服，不過只限前排，後排座位可算係DogSeat，上落唔方便兼逼狹，咁都好，起碼唔算係趕絕外母吖，佢老人家唔嫌屈就嘅咪坐落嚟囉！
操控方面，直路無敵毋須多講，而憑着重心穩定兼恒式四驅，令彎路快放一樣自如，呢個時候兩噸車重反而發揮優點，令入彎更穩定，加埋強化咗剛性嘅底盤、懸掛系統等，操控性毋庸置疑。