高清《智能叛變》快過美版<br>銀色機膚零瑕疵

高清《智能叛變》快過美版
銀色機膚零瑕疵

筆者𠵱家中咗高清毒,上星期多得韋史密夫套《天煞地球反擊戰》,搞到禮拜日都唔得閒!今個星期依然有佢,就係經典科幻大片《智能叛變》。據代理表示,美版喺後日先在本土推出,香港𠵱家已經有行貨!呢隻Blu-ray最大吸引力在於高清畫質下,仍能把真實物件及電腦CG結合,給人強烈真實感,唔會因為畫質太清,有假假哋的情況,所以睇嗰時特別爽!

記者:洪偉順
鳴謝:D&M(25166862)

畫評:機械人金屬感強

《智能叛變》係一套真實場景、人物,再結合電腦3D效果拍成的荷李活大片。影音專家William指出:「在高清1080P下,畫面顏色豐富、反差大,而且鮮艷的色彩製造出層次鮮明,極具立體感的感官世界。」不過,這類經電腦加工合成嘅科幻片,喺Blu-ray高清畫面下有機會「穿崩」,意思是睇到電腦3D效果好似Key上去咁,畀人好假嘅感覺。但William依然畀套戲10粒星:「現實同3D效果結合得好Perfect,韋史密夫與機械人主角Sunny的對手戲好流暢,觀眾更可以分辨出Sunny身上的銀色金屬及黑色膠質,而且呈現得好自然,唔似電腦做過手腳,好真!直情用肉眼就感覺到機械人的冰冷金屬感,呢啲嘢喺DVD就睇唔到,更加唔好講Detail位。」筆者亦留意到一樣嘢,就係戲裏面原來Sunny個瞳孔係會收縮㗎!好多位喺DVD根本睇唔到,惟有Blu-ray版補番數。

■D&M市場及產品經理WilliamChang

■齋睇呢幕場面,就可以分到機械人身上的金屬細節位。

■留意Sunny身上被子彈擊中所產生的火花,好Detail。

■在黑夜,黑色膠質頭盔同黑色皮衣都可分辨出來。

■物件快速郁動時,整體畫面依然好穩定。

聲評:用5.1依然好聲

上星期介紹嘅《龍虎門》採用DTS-HDMA7.1的音效格式,但今次呢套荷李活大製作《智能叛變》竟回頭用5.1,係人都知5.1比唔上6.1同7.1啦!不過William就好欣賞今次嘅音效:「𠵱家好多片拍攝時仲用緊錄製5.1聲效格式的收音器材,而且好多戲院都仲係提供5.1聲效,平時聽到的7.1聲效只係後期再加工,用來加強現場的包圍感。所以5.1聲效始終最原汁原味,《智能叛變》Blu-ray版用上DTS-HD非損耗式聲音壓縮科技,提供48kHz/16-bit的聲效規格,包圍感依然強烈,成套戲製作出色,絕對唔會因為音效唔用7.1而被扣分。」

■物件撞擊的低音很集中,不會四散。

■在高速公路上,車胎高速轉動時的嘶嘶聲很明顯。

幕後花絮:睇片即時解畫

今次加入一項隨片智能式特別收錄功能,意思係當睇片時,按下相關按鈕,就可以即時欣賞畫面分割出來的幕後資料,例如製作花絮。但要注意一點,此功能只可在有BDJava的Player才可用到。

機械人Sunny的誕生﹗

■先做出Sunny的骨骼,再套上皮膚,最後演員在幕後用道具衣演繹。

■用CG效果製造出來的2035年芝加哥。

■配角原來係《變形金剛》男主角沙拉保夫。

Blu-ray
售價:$239
查詢:DVDPRO(23326326)

本周新碟速遞

Blu-ray
《殺手47》$239

大量革命性暴力美學及爆破槍戰鏡頭。

《蘋果核戰電影版第二集》$230

2D同3D動畫的完美結合。

《變種異煞》(美版)$175

講述結合最優良基因的新人類。

《魔間傳奇》(美版)$245

無晒人的紐約空城最值得睇。

3區DVD
《犯罪帝國》$88

兩大奧斯卡影帝鬥戲連場。

《魔戰王:貝奧武夫》$140

用電腦技術掃描真人演員再拍成勇者鬥惡魔的3D片。

《初雪之戀》$88

韓星李準基同日星宮崎葵主演的青春戀愛片。

《101斑點狗》(雙碟白金珍藏版)$108

經典動畫全新數碼修復。