我醫神今日第一次同大家見面，請大家多多指教！我嘅興趣係鑽研同健康有關嘅嘢，仲要加埋理性分析，打破一啲想當然嘅迷思。近排天氣回暖，身邊嘅女同事都急住將臃腫嘅厚大衣除低，大晒短裙春裝，但係成個冬天積積埋埋啲贅肉，認真令人苦惱，所以我急急同大家介紹「春天瘦身第一擊」。
芹菜魔芋低能量高纖
除咗啲少油少甜多蔬菜嘅老生常談減肥規矩，今年春季不妨搞啲創意，做啲唔使捱餓，又唔會營養不良嘅健康減肥行動。我哋要求好高，就係又要贅肉遠離我，又唔好畀體重急速反彈，最重要係揀啲低能量、但含豐富膳食纖維嘅食物。芹菜同魔芋就係其中一啲低能量高纖嘅食物，食得多都唔會有增磅危機，減肥嘅時候又唔怕要捱肚餓，另外一啲推薦嘅低能量食物有冬瓜、海帶同黃瓜，可以抵抗脂肪嘅吸收。
減肥仲要識得其他招數，嚴格控制鹽嘅攝取量，每日唔能夠多過六克；肉類最好用蒸、燉、焗同埋燒嘅方法去煮；蔬菜就不妨生食，若帶飯盒返工，避免帶隔夜餸，因為食物嘅營養會降低，最好揀新鮮嘅食材。
打破減肥嘅錯誤迷思，至可以成功瘦身，例如一日三餐要食得準時，少吃一餐減少嘅熱量其實唔多，反而空肚嘅時間太長，再食嘢啲時候就容易食得太多，所以一定要少食多餐。仲有呀，記住要慢慢食，如果食得太快，個腦跟唔上，搞到食得太飽都唔知，到個腦知飽嘅時候已經太遲喇！
blog主：醫神