藍籌股業績表現成為近期市場焦點之一，昨日三隻藍籌股太古（019）、新地（016）同電盈（008）公佈業績，對後市有何啓示呢？
郭：郭家耀 喬：張小喬 玲：楊慧玲
玲：呢排好多大藍籌公佈業績，太古、新地同電盈都分別公佈咗。最早公佈業績嘅太古，今次業績幾好，舊年盈利升咗16%，遠勝預期。對佢嘅股價有冇支持呢？定係會好似其他藍籌咁，公佈完業績之後大跌？
郭：太古業績增長唔錯，租金收入穩定，大家比較關心佢嘅航運業務，08年增長會唔會因為次按影響經濟而變差，油價上升同經濟衰退呢兩個問題，都有機會影響國泰航空（293）今年嘅前景，所以業績公佈之後對太古股價冇乜刺激。
玲：好多人都趁業績公佈之後出咗貨，窩輪巿場有冇反映到呢樣嘢呢？
喬：其實今日留番喺輪場嘅資金唔多，太古窩輪佔整體成交量好少，所以太古窩輪睇唔到有咁嘅情況。其實𠵱家市場注意力都喺新股、國企股好似原材料股、油股、新進基建股中交建（1800）。
玲：買太古嘅人好多都唔係短炒，以長線為主。睇番佢喺大陸租金收入今年會入賬，香港租金收入又穩定，如果做長線投資，現水平吸唔吸引呢？
郭：作為一間綜合企業我唔覺太古表現好好，唔少機構投資者唔睇好太古前景，所以沽售股票。好多地產股前排大跌，太古跌得未夠深，如果係當佢地產股咁睇，我會揀同一日公佈業績嘅新地。
洛陽鉬業（3993）
唔怕坐多陣
John：喺IPO嘅時候入咗洛陽鉬業（3993），佢上到廿幾蚊嗰時冇放到，𠵱家只有高位嘅一半，想問吓點算好？
玲：IPO即係6.8蚊入，噚日個價比上市首日收市價10.82蚊仲要低。
郭：近期黃金升勢唔錯，加上美元疲弱，洛鉬股價跌咗咁多主要係市場氣氛逆轉，同佢本身業務無關，所以佢現價比高位回落咗唔少，如果𠵱家沽出，個價錢就唔係太理想，可以睇多陣先。
喬：以IPO價錢入市守到𠵱家，唔需要急住放，可以等大市不明朗因素消除，國企指數升番之後先走。過去幾日見到有專業投資者重新入市，顯示港股將逐步見底。洛鉬技術走勢唔差，𠵱家去番10天平均線爭持，中長線目標有機會去到10.3至11.5蚊。
《北角John個案》
買入價：6.8元
目標價：-
止蝕價：-
時期：-
華潤置地（1109）
勝在不起眼
鄺小姐：近日中央提到會增加中低價住宅嘅供應，想問如果𠵱家買入華潤置地（1109）係咪一個合適嘅時間？
玲：咁多隻內房股入面，雅居樂（3383）、碧桂園（2007）較出名，點解要推介呢隻？
鄺：人哋話「槍打出頭鳥」，中央會打擊出名嗰啲先，所以揀華潤置地。
郭：市場仍然擔心中央政策會打擊地產商，例如懲罰地產商囤積土地，華潤置地比較好嘅地方係母公司有機會注資，下跌風險比前兩者低，長線嚟睇前景唔錯，防守性亦唔差。
喬：買內房股有兩點要考慮，第一係中央未來宏調措施，第二係內房股高潮已過，今年仲可唔可以有驚喜就令人懷疑。
《九龍灣鄺小姐建議》
建議買入價：13.22元
目標價：-
止蝕價：-
時期：三個月