二月二十三日本欄提及高人指點，花生浸白醋，可降血壓。嘩，一寫出嚟，即刻搞到《蘋果》副刊名采版收電郵收到手軟，轉過嚟嘅有幾十至近乎一百件，左丁山睇咗一輪，原來大量讀者關心血壓高，絕大部份都想試吓高人嘅方法。乜唔係啫，花生與白醋，並非昂貴，如果得嘅話，直情又平又靚。
既然有咁多人問，左丁山自有義務去搵答案，以釋讀者心中疑團，包括（一）花生是否要煮熟？（二）花生是否要洗亁淨，（三）花生與白醋各自份量如何？（四）要浸幾耐？
碰啱左丁山上星期無事忙，周圍撲，一時之間抽唔出時間去搵高人，直至今個星期一，先至有機會約到高人會面。正是大隱隱於市，高人原來身在深水埗，而左丁山起碼有十幾年未去過深水埗，要麻煩秘書上網下載地圖，睇咗一輪，都唔記得點樣去，於是從中環過海，在油麻地地鐵站走出嚟，搭的士，跳錶跳到四十幾蚊之後，就在高人所在嘅大廈落車。
高人之辦公室內，燒住檀香，錄音機播出佛號南無阿彌陀，一聽就覺得耳根清淨。高人話佢自己過往血壓甚高，最高曾經去到二百，後得禪宗氣功師傅指點，吃花生浸白醋，久之，現已降到一百五十，以佢六十歲嘅年紀，算係正常，所謂正常，就係上不超過一百五十，下不高於九十。高人話花生浸白醋嘅方法十分簡單，到雜貨舖買半斤紅衣花生，生嘅，不用炒熟，煲熟，不用清洗，放落一個清洗咗嘅容器（例如花生醬食完之後空置嘅卡夫花生醬玻璃樽）之內，之後往罐內注滿白醋（即米醋），浸十日便可食用，每晚臨睡可吃四粒，日日量住血壓，血壓低過一百五十之後，就只吃兩粒。高人以神農嘗百草之方式，話明係身體力行見效嘅。至於此法有無科學內涵，佢冇研究，但講明胃酸過多者或對花生敏感者，不可服用。此外，自然療法專家披圖梁亦來電郵，警告有胃病者不可亂飲白醋，而常人亦不宜常飲醋，免生胃病，如對此有疑問，可直接問佢。