本是天之驕女的鍾欣桐（阿嬌），因一場淫照風暴而形象破產。一沉百踩，全城玉女乘機攝位搶飯碗，鄧麗欣自封小朋友偶像，就連年僅19歲、新晉人氣𡃁模Angelababy（楊穎）也分一杯羮，阿嬌甫辭演新片《武俠梁祝》，她即「嗱嗱聲」試鏡話到明恨拍，又暗寸疑似女星親熱期間拍淫照破壞氣氛，唯獨力撐疑似張栢芝的照片影得靚，更謂越來越鍾意栢芝。
鍾欣桐出道以來憑乖巧外表及玉女形象，俘擄無數小朋友和少男的心，可惜淫照風暴颳起令其純真形象徹底破產，百分之九十九由她任代言人的廣告被抽起，新片《梅蘭芳》內的戲份被刪，就連馬楚成新片《武俠梁祝》也只得無奈放手。
男友健康
「影咁嘅相破壞氣氛」
難得有位攝，搶飯碗者自然排住隊上，先有鄧麗欣自封小朋友偶像力爭兒歌市場，年僅19歲的𡃁界女神兼人氣𡃁模Angelababy也來湊熱鬧，三扒兩撥已往試鏡斟拍《武》片，又揚言恨拍兼力sell自己有跳舞底子，主動得毫不矯飾。
講青春，Angelababy比阿嬌贏至少三條街，但她卻絕對不儍也不天真，日前她在金鐘試新裝並接受本報專訪時，她說：「我識嘅男朋友都好健康，從來冇要求我影呢啲相（淫照）。我覺得情到濃時影埋啲咁嘅相好破壞氣氛。啲女仔當時可能覺得自己同佢拍緊拖，所以可以接受，但其實個男仔仲有好多女仔，原來佢咁花心。」
自從疑似張栢芝的淫照廣泛流傳後，一直有傳她與謝霆鋒的婚姻「凍過水」，不過身為栢芝死忠fans的Angelababy卻說：「我覺得栢芝啲相影得佢好靚喎！我仲越嚟越鍾意佢㖭，希望佢嘅幸福唔好受今次事件影響啦！」
其實Angelababy自出道以來，形象言行一向率性，從不刻意掩飾小腹和腳背上的紋身，與組合SunBoy'z成員陳偉霆（William）的戀情更已浮出水面，Angelababy的率真，自然比阿嬌的「天真」更受歡迎。
Angelababy的率直個性還不止於此，身為模界新星，大有條件品評港女穿衣品味，她說：「我覺得識打扮嘅女仔都集中晒喺銅鑼灣同尖沙嘴呢啲地區，反而唔識着衫嘅就多數喺深水埗同油麻地。我記得有次喺油麻地撞見個女仔，成身冒牌貨，仲要着件粉紅色衫，上面有個好大個嘅熊仔頭，下身就着條綠色闊腳褲，真係好難忘，如果佢係一個師奶，着成咁我會體諒佢囉！」
最愛以背心短褲打扮示人的Angelababy，就連打扮也不甘平凡，她說：「我好鍾意螢光色，我覺得夏天嘅衫應該sharp啲，可以試吓撞色或者着螢光色，我就鍾意粉紅色襯螢光黃，綠色長襪配金色或者黃色短裙。」
自嘲平胸
「人哋以為我係男仔」
不過Angelababy還是有死穴的，那就是她的身材，她說：「影相嗰陣唔可以着三點式，始終我只得19歲，反而平時去玩就會着。真空行騷就未試過，我太瘦喇，行出嚟人哋仲以為我係男仔呀！」
此外，拍電影《無間道II》時曾因陳冠希不集中而摑了他一巴的導演劉偉強，昨日接受電台訪問時，被問到會否再把陳冠希摑醒時，他說：「用另一個方法啦，都有通電話嘅，今次係比較特別啲嘅事件嚟嘅，我覺得幫忙會好啲，唔好用鬧嘅方法。」劉偉強又指陳冠希除公開道歉外，也應親自打電話給受傷害的人，又表示對他退出香港娛樂圈感可惜。談到二人的通電內容，劉偉強說：「我叫佢忍耐啲，喺呢個地步，忍耐啲，等事件丟淡我哋再坐低慢慢傾啦。」至於忍耐到何時，他則表示現階段屬未知之數。
採訪：吳佩思
攝影：林德雄
場地及服裝：mi-tu
人物誌：𡃁界索模紋身示愛
被封為𡃁界索模的Angelababy，今年19歲，去年才成為全職模特兒。Angelababy的媽媽是上海人，爸爸是香港人，因父親的外婆是德國人，故擁有德國血統，在上海出生後她就跟隨媽媽在當地生活，中三才來港升學，在聖母院書院讀到中五，14歲起任兼職模特兒，曾拍港台劇《天下無敵》和《獅子山下》，去年投身幕前參演電影《破事兒》。
Angelababy一直被傳與SunBoy'z成員陳偉霆（William）拍拖，近日她自爆腰部有十字架紋身，恰巧William也在相同位置紋有相同的圖案。而她與另一人氣靚模JaniceMan（圖右）則是十分要好的朋友。
